పేద కుటుంబానికి చెందిన విద్యార్థిని చదువుకు విజయనగరం జిల్లా పాలనాధికారి హరిజవహర్లాల్ భరోసా కల్పించారు. గుమ్మలక్ష్మీపురానికి చెందిన ఎం.అంజలి.. బొబ్బిలిలోని ఓ కళాశాలలో బీ ఫార్మసీలో చేరింది. అనంతరం అనారోగ్యంతో ఇంటికే పరిమితమైంది. కోలుకున్నాక.. కళాశాలకు వెళ్లగా రూ.లక్ష చెల్లిస్తేనే సీటిస్తామని చెప్పగా.. శుక్రవారం కలెక్టరుకు సమస్య తెలియజేసింది.
ఆయన కళాశాల ప్రిన్సిపల్తో మాట్లాడి, ఫీజు చెల్లించే ఏర్పాటు చేస్తానని, సీటు ఇవ్వాలని కోరారు. ఐటీడీఏ పీవో కూర్మనాథ్తోనూ మాట్లాడి.. అవసరమైన ఫీజును ఐటీడీఏ నిధుల నుంచి చెల్లించాలని సూచించారు. బీ ఫార్మసీ పూర్తి చేసి మంచి ఉద్యోగంలో స్థిరపడాలని విద్యార్థినికి కలెక్టర్ సూచించారు.