ఇంటి దొంగలను పట్టుకున్న పోలీసులు

భర్తకు తెలియకుండా.. నగలు, డబ్బును దాచి పెట్టి చోరీ జరిగిందని పెద్ద నాటకమే ఆడిందో మహిళ. ఇంట్లో దొంగలు పడి మెుత్తం దోచుకెళ్లిపోయారని పోలీసులకు సైతం ఫిర్యాదు చేసింది. దీనంతటికీ కుమారుడు సహకరించాడు. పోలీసులు రంగంలోకి దిగటంతో అసలు విషయం బయటపడి.. నిందితులిద్దరూ కటకటాలపాలయ్యారు.

విజయనగరం జిల్లా బొబ్బిలిలో రెండు రోజుల క్రితం జరిగిన చోరీ అంత హైడ్రామా అని తేలిపోయింది. చోరీ జరగకుండానే జరిగినట్లు సీన్​ క్రియేట్​ చేసి పోలీసులను నమ్మించాలని చూశారు. చివరకు ఫిర్యాదుదారులే ముద్దాయిగా తేలడంతో కటకటాలపాలయ్యారు.

• ఏం జరిగిందంటే...

బొబ్బిలి పట్టణం గొల్ల వీధి కూడలిలోని ఓ ఇంట్లో రెండు రోజుల క్రితం చోరీ జరిగినట్లు భోగి సుజాత పోలీసులకు ఫిర్యాదు చేశారు. 13 తులాల బంగారు ఆభరణాలు, కిలోన్నర వెండి వస్తువులు , సుమారు 3 లక్షల నగదు చోరీకి గురైనట్లు ఫిర్యాదులో పేర్కొన్నారు. పోలీసులు వెంటనే రంగంలోకి దిగి దర్యాప్తు ముమ్మరం చేశారు. రెండు రోజుల్లోనే అసలు విషయం తెలిసింది. చోరీ జరగకుండానే జరిగినట్లు కట్టు కథ అల్లినట్లు తేలింది. భార్య సుజాత, ఆమె కుమారుడు కలిసి భర్తకు తెలియకుండా బీరువాలో ఉన్న నగలు, నగదు వేరే చోట దాచి.. పోయినట్లు ఫిర్యాదు చేశారని దర్యాప్తులో తేలింది.

క్లూస్ టీమ్ ద్వారా దర్యాప్తు నిర్వహించగా భార్య, కుమారుడు ఫింగర్ ప్రింట్స్ మాత్రమే ఉండటంతో పోలీసులు మరింత లోతుగా దర్యాప్తు నిర్వహించారు. దీంతో అసలు దొంగలు ఇంటి వారనే అని తేలటంతో నిందితులను అరెస్టు చేసినట్లు డీఎస్పీ వెల్లడించారు. వేరే చోట దాచిన నగలు, నగదు కూడా రికవరీ చేసినట్లు తెలిపారు. అప్పులు ఎక్కువగా ఉండటంతో వాటి నుంచి తప్పించుకునేందుకు ఆమె ఎత్తుగడలు వేసినట్లు పోలీసులు తెలిపారు.

ఇదీ చదవండి:స్వచ్ఛ సేవలో పాల్గొన్న విజయనగరం కలెక్టర్