కరోనా యోధురాలు... 86 ఏళ్ల వయసులో వైరస్​పై విజయం

కరోనాపై పోరులో యువతే అలిసిపోతుంటే.. అలుపెరగని పోరుచేసి వైరస్​పై విజయం సాధించింది 86 ఏళ్ల వృద్ధురాలు. విజయనగరానికి చెందిన గోదాదేవికి కరోనా సోకింది. వ్యాధి బారిన పడినా.. మనోనిబ్బరంతో కరోనాను జయించింది. కొవిడ్ నుంచి కోలుకున్న ఆమెను జిల్లా ఎస్పీ రాజకుమారి పరామర్శించారు. పండ్లు అందించి, శుభాకాంక్షలు తెలిపారు.

విజయనగరంలోని కొత్త అగ్రహారానికి చెందిన మంగళగిరి గోదాదేవి అనే 86 ఏళ్ల వృద్ధురాలు కరోనాను జయించింది. మిమ్స్ ఆసుపత్రిలో చికిత్స పొందిన ఆమె... శుక్రవారం డిశ్ఛార్జి అయ్యారు. వృద్ధురాలిని జిల్లా ఎస్పీ బి.రాజకుమారి పరామర్శించారు. ఆమె ఆరోగ్యం గురించి వాకబు చేసి, పండ్లు అందించారు.

ఎస్పీ రాజకుమారి మాట్లాడుతూ.... మనలో మనోధైర్యం, ఆత్మవిశ్వాసం ఉంటే కరోనాను జయించవచ్చు అనడానికి వృద్ధురాలు నిదర్శనమన్నారు. 86 సంవత్సరాల వయస్సులో కూడా ఆమె ఎంతో మనోనిబ్బరంతో ఒంటరిగా కరోనాను ఎదుర్కొని, జయించారన్నారు. ప్రజలెవ్వరూ కరోనా అంటే ఆందోళన చెందాల్సిన అవసరం లేదని, కరోనా పట్ల అప్రమత్తంగా ఉంటే చాలన్నారు. ముందస్తు జాగ్రత్తలు పాటించడం వలన కరోనా రాకుండా అడ్డుకోవచ్చునన్నారు. కరోనా సోకినా బలవర్థక ఆహారం తీసుకుంటే నయం అవుతుందన్నారు.తరచూ చేతులు సబ్బుతో శుభ్రంగా కడుక్కోవడం, మాస్క్ తప్పనిసరిగా ధరించడం, భౌతిక దూరం పాటిస్తూ కరోనాను తరిమికొట్టాలని పిలుపునిచ్చారు.

డీజీపీ గౌతం సవాంగ్, విశాఖ రేంజ్ డీఐజీ ఎల్.కె.వి. రంగారావు సైతం వృద్ధురాలికి శుభాకాంక్షలు తెలిపినట్లు ఎస్పీ చెప్పారు. పోలీసు ఉన్నతాధికారి అయిన ఎస్పీ రాజకుమారి తనను పరామర్శించడం ఎంతో ఆనందంగా ఉందన్నారు గోదాదేవి. అనంతరం ఎస్పీ గోదాదేవి కుటుంబ సభ్యులతో మాట్లాడి, ఆమెను చక్కగా చూసుకోవాలని కోరారు. వృద్ధురాలికి సాయం అందించిన మహిళా కానిస్టేబుల్ రాధికను ఎస్పీ అభినందించారు.

ఇదీ చదవండి :రేషన్ బియ్యం కార్డే ఆదాయ ధ్రువీకరణ పత్రం