పట్టణాల్లో నిర్లక్ష్యం... పల్లెల్లో అప్రమత్తం

అప్రమత్తతే ఔషధం. ఇది కరోనా వ్యాప్తి నిరోధానికి మరీ ముఖ్యమని కేంద్ర, రాష్ట్ర ప్రభుత్వాలు పదేపదే చెబుతున్నా... కొందరు పట్టణవాసులు మాత్రం నిర్లక్ష్యంగా వ్యవహరిస్తున్నారు. చెత్త కారణాలు చెబుతూ రోడెక్కి చక్కర్లు కొడుతున్నారు. లాఠీ దెబ్బలు పడినా.. అడ్డదారుల్లో తిరిగేందుకు ప్రయత్నిస్తున్నారు. పల్లెల్లో మాత్రం ఇందుకు పూర్తి భిన్నమైన పరిస్థితులు ఉన్నాయి. మా గ్రామానికి రావొద్దంటూ పొలిమేరల్లో బోర్డులు పెట్టి, ముళ్లకంపలతో రహదారులు మూసివేస్తున్నారు. గ్రామస్తులను సైతం బయటకు వెళ్లనివ్వడంలేదు.

ప్రపంచాన్ని గజగజవణిస్తున్న మహమ్మారి కరోనా... మనవాళి మనుగడనే ప్రశ్నార్థకం చేస్తోంది. ప్రపంచంలో 170 కోట్ల మంది ఇళ్లకే పరిమితం అయ్యారంటే పరిస్థితి ఎంత తీవ్రస్థాయిలో ఉందో అర్థం చేసుకోవచ్చు. కరోనా వ్యాప్తి దృష్ట్యా దేశం మొత్తం లాక్​డౌన్​ అయ్యింది. ఇలాంటి సమయంలోనూ ప్రాణాలతో చెలగాటం ఆడుతున్నారు కొంత మంది పట్టణ వాసులు. ఆంక్షలు ఉన్నా, పోలీసులు లాఠీలకు పనిచెబుతున్నా.. ఏం కాదులే అన్న నిర్లక్ష్య ధోరణితో రోడ్డెక్కెస్తున్నారు. పల్లెవాసులు మాత్రం ఇందుకు భిన్నంగా వ్యవహరిస్తున్నారు. 'మా గ్రామంలోకి రావద్దు' అంటూ బోర్డులు పెడుతున్నారు. గ్రామస్తులను సైతం ఊరు దాటి పోనివ్వటంలేదు. కరోనా వ్యాప్తి నివారణలో ఇలాంటి పల్లెలే పట్టణాలకు ఆదర్శంగా నిలుస్తున్నాయి.

విజయనగరం జిల్లాలో...

విజయనగరం జిల్లా కురుపాం నియోజకవర్గంలో జియ్యమ్మవలస, కురుపాం మండలాల్లో పలు గ్రామాల్లో ప్రజలే 'విలేజ్ లాక్​డౌన్' ప్రకటించారు. ఎవరైనా గ్రామం నుంచి బయటకు వెళ్లినా, బయట నుంచి ఎవరైనా వచ్చినా జరిమానా విధిస్తున్నారు. చెక్ పోస్టులు పెడుతూ స్వీయ నియంత్రణ పాటిస్తూ అందరికీ ఆదర్శంగా నిలుస్తున్నారు. గిరిజన గ్రామాల్లో సైతం ఇదే పరిస్థితి కనిపిస్తోంది. జిల్లాలోని ఎస్ కోట మండలంలోని లచ్చందొరపాలెం‌, మరుపల్లి, ఒడ్డు మరుపల్లి గిరిజనవాసులు తమ గ్రామాల్లోకి ఎవరు రాకుండా కంచెలు వేశారు.

విశాఖ జిల్లాలో..

కరోనా ప్రబలుతున్న నేపథ్యంలో విశాఖ జిల్లా అనకాపల్లిలోని శ్రీనివాసనగర్ కాలనీవాసులు చెక్​పోస్టు ఏర్పాటు చేసుకున్నారు. ఎవరూ ఇళ్లనుంచి బయటకిరావద్దని కోరుతున్నారు. అనకాపల్లి మండలం వెంకుపాలెం గ్రామస్తులు సైతం చెక్ పోస్ట్ ఏర్పాటు చేసుకుని స్వీయ నియంత్రణ పాటిస్తున్నారు.

శ్రీకాకుళం జిల్లాలో...

శ్రీకాకుళం జిల్లా పాతపట్నం సరిహద్దుల్లోని ఆంధ్ర-ఒడిశా సరిహద్దుల్లో వాహనరాకపోకలను నియంత్రిస్తున్నారు. బుధవారం ఉదయం 6 గంటల నుంచి 9 గంటల వరకు మాత్రమే వాహనాలు అనుమతించారు. అనంతరం పూర్తిస్థాయి లాక్​డౌన్ అమలుచేశారు.

అనంతపురం జిల్లాలో..

అనంతపురం జిల్లా పెనుకొండ మండలంలోని ఎర్రమంచి గ్రామంలో ఏర్పాటైన కియా కార్ల పరిశ్రమలో అధిక శాతం విదేశాలకు చెందిన వారే పని చేస్తున్నారు. గ్రామంలోకి విదేశీయులు రాకుండా ఎర్రమంచి - కురుబవాండ్లపల్లి ప్రధాన రహదారిని ఊరి ప్రజలు ముళ్లకంపలు వేసి మూసివేశారు. కొత్తవారు ఎవరూ రాకూడదని.. ప్రతి ఒక్కరు తమ ఇంటి వద్దనే ఉండాలని సూచిస్తున్నారు. ఈత కల్లు కోసం ఇతర ప్రాంతాల నుంచి వస్తున్న ప్రజలను గ్రామంలోకి రావద్దని హెచ్చరిస్తున్నారు.

ఇదీ చదవండి: