శిక్షణ సమయంలో ప్రమాదం.. నేవీ ఉద్యోగి మృతి

Indian Navy Employee Died: విజయనగరం జిల్లా చీపురుపల్లి మండలం పర్ల గ్రామానికి చెందిన ఇండియన్ నేవీ ఉద్యోగి చందక గోవింద్​ (30) మృతితో.. వారి కుటుంబంలో విషాదఛాయలు అలుముకున్నాయి. కలకత్తాలో పారాచూట్ శిక్షణలో చోటుచేసుకున్న ప్రమాదంలో గోవింద్ మృతి చెందారు.

Indian Navy Employee Died: అతనో నావికాదళ ఉద్యోగి.. ఇంటికి పెద్ద కుమారుడు. ఏడాది క్రితం తండ్రిని కోల్పోవడంతో.. అప్పటి నుంచీ తల్లి, సోదరి, సోదరుడిని అన్నీ తానే చూసుకుంటున్నాడు.. గోవింద్. కానీ ఇంతలోనే వారి కుటుంబంలోకి తీవ్ర విషాదం ఉప్పెనలా దూసుకువచ్చింది. శిక్షణ కోసం కోల్​కతా వెళ్లిన పెద్ద కుమారుడు గోవింద్.. ప్రమాదంలో మృతి చెందారనే వార్తతో వారి కుటుంబంలో ఒక్కసారిగా చీకటి కమ్మేసినట్లు అయింది.

జీవితంలో ఏదో సాధించాలని.. దేశానికి సేవ చేయాలని ఎంతో ఉత్సాహంగా వెళ్లిని కుమారుడు.. మళ్లీ ఇంటికి వచ్చేది విగత జీవిగానే అని తెలిసిన ఆ తల్లి కన్నీటిని ఎవరు ఆపగలరు. ఏమని చెప్పి ఆపగలరు. ఏడాది క్రితమే భర్తను కోల్పోయి.. ఆ బాధ నుంచి కోలుకోక మునుపే మరో విషాద వార్త విని ఏ తల్లి మాత్రం తట్టుకోగలదు.

విజయనగరం జిల్లా చీపురుపల్లి మండలం పర్ల గ్రామానికి చెందిన ఇండియన్ నేవీ ఉద్యోగి చందక్ గోవింద్ భవిష్యత్తుపై ఎన్నో ఆశలతో తనకు ఇష్టమైన నావికాదళంలో ఉద్యోగాన్ని పొందాడు. కానీ అతను శిక్షణ సమయంలో మృతి చెందడంతో.. గ్రామంలో విషాదఛాయలు అలుముకున్నాయి. పారాచూట్ శిక్షణలో చోటు చేసుకున్న ప్రమాదంలో గోవింద్ (30) మృతి చెందారు. దీంతో కుటుంబ సభ్యులు కన్నీరు మున్నీరై విలపిస్తున్నారు.

నేవీ ఉద్యోగి గోవింద్ కోల్​కతాలో పారాచూట్ శిక్షణ తీసుకోవడం కోసం వెళ్లారు. గోవింద్ నేవీలో పని చేస్తూ.. సముద్ర జలాల్లో పహారా కాసేవాడు. కోల్​కతాలో పారాచూట్ శిక్షణ కోసం ఇటీవల విశాఖపట్నం నుంచి వెళ్లాడు. ఈ శిక్షణ సమయంలో ప్రమాదవశాత్తూ మృతి చెందాడు. ఈ మేరకు విశాఖపట్నం నావికాదళ అధికారులు కుటుంబానికి సమాచారం అందించారు.

చందక రామకృష్ణ, లక్ష్మీ దంపతుల పెద్ద కుమారుడు చందక గోవింద్. గోవింద్ తండ్రి చందక రామకృష్ణ ఏడాది క్రితం మరణించారు. దీంతో అప్పటినుంచి కుటుంబానికి అన్నీ తానై చూసుకుంటున్నాడు. తల్లి లక్ష్మి, సోదరి, సోదరుడిని పెంచేవాడు. ప్రమాదంలో గోవింద్ మృతితో.. పెద్దదిక్కును కోల్పోవడంతో వారంతా కన్నీరుమున్నీరై రోదిస్తున్నారు.

ప్రస్తుతం మృతదేహం కోల్​కతాలో ఉందని, గురువారం మధ్యాహ్నానికి గ్రామానికి చేరుతుందని స్థానిక పెద్దలు చెప్తున్నారు. గోవింద్ మృతి అతని కుటుంబ సభ్యులకు, దేశానికి తీరని లోటు అని గ్రామస్థులు తెలుపుతున్నారు. దీంతో గ్రామంలో విషాయఛాయలు అలుముకున్నాయి.

ఇవీ చదవండి: