పెందుర్తి ఠాణా పరిధిలో దారుణం జరిగింది. వివాదం కారణంగా మనస్థాపానికి గురైన ఓ మహిళ తన కూతురిని తీసుకొని ఇంటి నుంచి వెళ్లిపోయింది. కుటుంబసభ్యుల ఫిర్యాదు మేరకు కేసు నమోదు చేసిన పోలీసుల... దర్యాప్తులో వెలుగుచూసిన విషయాలతో నిర్ఘాంతపోయారు.
స్థానిక ఏసీపీ స్వరూప తెలిపిన వివరాల ప్రకారం... పులగానిపాలెం గ్రామానికి చెందిన కె.సుమలత ఆమెతో పాటు తన 18నెలల పాప కనపడటంలేదని ఈనెల 6న పెందుర్తి పోలీస్స్టేషన్లో ఆమె కుటుంబసభ్యులు ఫిర్యాదు చేశారు. పోలీసులు దర్యాప్తు చేపట్టగా... చిన్న ముషిడివాడ కాలనీ కొండలమీద నుంచి దిగుతూ ఒక మహిళ కనిపించినట్లు సమాచారం వచ్చింది. పోలీసులు ఆ ప్రాంతానికి చేరుకొని సుమలతగా గుర్తించారు.
ఆమెను విచారించగా తన కూతురు చనిపోయిందని... కొండ ప్రాంతంలో గొయ్యి తీసి పూడ్చిపెట్టినట్లు తెలిపింది. కొండపైన గాలింపు చేపట్టగా ఎటువంటి ఆధారాలు లభించలేదు. డాగ్ స్క్వాడ్‌ సాయంతో గాలిస్తున్నట్టు ఏసీపీ స్వరూప తెలిపారు. సుమలత మానసిక పరిస్థితిపై అనుమానంతో ఆస్పత్రిలో చికిత్స చేయిస్తున్నట్టు ఏసీపీ చెప్పారు.