విశాఖ జిల్లాలో ఖరీఫ్ కు సంబంధించి 1లక్షా 2 వేల 740 హెక్టార్లలో వరి సాగు చేశారు. సాగు చేసిన మొత్తం, విస్తీర్ణం, గ్రామాల వారీగా రైతులు భూముల సర్వే, నెంబర్ల వారీగా ఈ క్రాప్ నమోదు నమోదు చేసిన ప్రతి రైతుకు వైఎస్సార్ ఉచిత పంటల బీమా పథకం వర్తిస్తుందని ప్రభుత్వం ఇప్పటికే ప్రకటించింది. భారీ వర్షాలు, వరదలు వంటి ప్రకృతి వైపరీత్యాలతో పాటు అనావృష్టి వల్ల పంట పూర్తిగా దెబ్బ తింటే బీమా పథకం కింద రైతులకు నష్టపరిహారం అందుతుంది. అయితే ప్రస్తుతం నివర్ తుపాన్ ప్రభావంతో నెలకొన్న పరిస్థితి వేరుగా ఉంది. కోతకు వచ్చిన వరి పంట భారీ వర్షాలకు వేలాది ఎకరాల్లో నీట మునిగింది. తమ పంటలకు నష్టపరిహారం అందుతుందో లేదోనని రైతులు పలు సందేహాలను వ్యక్తం చేస్తున్నారు.
రైతులను ఆదుకునేలా చర్యలు తీసుకోవాలి
జిల్లాలోని ఇరవై ఏడు మండలాల్లో 23 వేల మంది రైతులకు సంబంధించి 11 వేల 500 హెక్టార్లలో వరి పంట దెబ్బతిన్నట్లు తేలింది. వైఎస్సార్ ఉచిత పంటల బీమా పథకం వర్తింపు పంటకోత ప్రయోగాలను అనుసంధానం చేశారు. జిల్లాలో 3800 ప్రయోగాలు చేయాలని వ్యవసాయ శాఖ నిర్ణయించింది. ఇప్పటివరకు 900 ప్రయోగాలు పూర్తిచేశారు. దీంట్లో 700 వరకు విశాఖ మన్యం, మిగిలిన 200 మైదాన ప్రాంతాల్లో చేపట్టారు. సాధారణంగా పంట కోత ప్రయోగం చేసిన 14 రోజుల్లో అంటే పనలు, కుప్పలు , నూర్చే సమయంలో తడిసిపోయిన నీరు ప్రవేశించిన ఇతరత్రా ప్రమాదం జరిగినా బీమా వర్తిస్తుంది. ఏజెన్సీలో పంట కోత ప్రయోగాలు పూర్తయిన వాటిలో వర్షాలకు దెబ్బతిన్న మండలాల్లో చింతపల్లి , కొయ్యూరు, గూడెంకొత్తవీధి తదితర మండలాలు ఉన్నాయి. మైదానంలో ప్రయోగాలు పూర్తిచేసిన మండలాల్లో వర్షం అధిక ప్రభావం చూపింది. పంట బాగా పండి చేతికి అందే సమయంలో దెబ్బతినడంతో నష్టాన్ని ఏ విధంగా అంచనా వేస్తారు ? అనేదానిపై రైతులు అనేక సందేహాలు వ్యక్తమవుతున్నాయి. మరికొన్ని చోట్ల వర్షం వల్ల మొలకెత్తిన ధాన్యాన్ని తీసుకుంటారా ? లేక మొత్తం నీటిలో మునిగిన పంటను తీసుకుంటారా ? అనేది వ్యవసాయ శాఖ స్పష్టం చేయాల్సి ఉంది. తక్షణమే సహాయం చేయాలని ప్రభుత్వాన్ని డిమాండ్ చేస్తున్నారు.
ఇవీ చదవండి
కేంద్రం సూచనలతో వ్యాక్సిన్ పంపిణీపై అధికారుల కసరత్తు!
