విశాఖ మీదుగా వెళ్లే వాల్తేరు డివిజన్‌ రైళ్లలో సమగ్ర ప్రక్షాళనకు అధికారులు సన్నద్ధమయ్యారు. ఇందుకోసం ప్రత్యేక సర్వే చేస్తున్నారు. విశాఖలోని రైల్వే కోచింగ్‌ డిపోలో 74 రైళ్ల నిర్వహణ జరుగుతుంది. వీటిలో ఏసీ, స్లీపర్, ఛార్జింగ్‌ పాయింట్ల దగ్గర నుంచి అన్ని సమస్యలపైనా దృష్టి పెడుతున్నారు. ప్రత్యేకించి నిర్వహణ లోపాలపై రైళ్ల వారీగా నివేదికలు తయారుచేస్తున్నారు. ట్విటర్, రైల్వే హెల్ప్‌లైన్లకు వచ్చే ఫిర్యాదుల్నీ క్రోడీకరిస్తున్నారు.
ఈటీవీ భారత్ కథనాలతో.. వాల్తేరు రైళ్లలో సమస్యలకు పరిష్కారం..
డివిజన్‌ నిర్వహించే 74 రైళ్లలో 40మాత్రమే అధునాతన లింక్‌ హాఫ్‌మన్‌ బుష్‌-ఎల్.హెచ్.బీ కోచ్‌లతో నడుస్తున్నాయి. మిగిలిన 34 రైళ్లలో పాత కోచ్‌లే ఉన్నాయి. ప్రస్తుతం డివిజన్‌ పరిధిలో.. 320 ఎల్హెచ్బీ కోచ్‌లుంటే అందులో 150దాకా పాతవే ఉన్నట్లు గుర్తించారు. వీటిలో లోపాలపై నివేదికలు తయారవుతున్నాయి.