అజ్ఞాతంలోకి డాక్టర్ సుధాకర్​

వైద్యుడు సుధాకర్​ ప్రభుత్వ మానసిక వైద్యశాల నుంచి డిశ్చార్జి అయ్యాక అజ్ఞాతంలోకి వెళ్లిపోయారు. విశాఖపట్నంలోని ఓ రహస్య ప్రదేశంలో విశ్రాంతి తీసుకుంటున్నట్లు తెలుస్తోంది. సుధాకర్​ను కలిసేందుకు ఐదు రోజుల దాకా ఎవరూ రాకూడదని ఆయన సన్నిహితులు చెబుతున్నారు.

మానసిక ప్రశాంతత కోసం డాక్టర్ సుధాకర్ అజ్ఞాతంలోకి వెళ్లారు. సుధాకర్​ను ప్రభుత్వ మానసిక వైద్యశాలలో చేర్పించిందేవరన్నది ఇప్పుడు చర్చనీయాంశమైంది. ఆయనే స్వయంగా వచ్చారంటూ మానసిక వైద్యశాల సూపరింటెండెంట్ డాక్టర్​ రాధారాణి ప్రకటన విడుదల చేశారు. సుధాకర్​ను పోలీసులు కేజీహెచ్​కు తీసుకురాగా ఓపీలో చూశామని.. ఆసుపత్రిలో హడావుడి సృష్టించడంతో మానసిక వైద్యశాలకు పంపామన్నారు. పోలీసులు వారి వాహనంలో తీసుకెళ్లారని కేజీహెచ్​ ఉన్నతాధికారులు వివరించారు.

కేజీహెచ్​లో చేర్పించాక సుధాకర్​ అక్కడి వైద్యుల అధీనంలో ఉన్నట్లేనని పోలీసులంటున్నారు. వారి సిఫారసుల ప్రకారమే తాము మానసిక వైద్యశాలకు తీసుకెళ్లాం. అంతేగాని సొంత నిర్ణయం తీసుకోలేదని పోలీసులు పేర్కొంటున్నారు. దీనిపై సీబీఐ అధికారులు దృష్టి సారించారు.

ఇదీ చదవండి: 'ఎస్​ఈసీ పునర్నియామకం'పై.. ఈ నెల 10న సుప్రీంలో విచారణ