నౌకదళానికి ఆధునిక ఆయుధాలు, సాంకేతికను అందించాలనే ఉద్దేశంతో...తూర్పు నౌకాదళం ప్రధానస్థావరమైన విశాఖలో ఎన్ఎస్టీఎల్ను ఆగస్టు 20,1969లో ఏర్పాటుచేశారు. డీఆర్డీవో పరిధిలోని ఈ నౌకా శాస్త్ర, విజ్ఞాన సాంకేతిక ప్రయోగశాల అంచెలంచెలుగా విస్తరించారు. ఈ కేంద్రంలో 120 కేడబ్ల్యూ కాంట్రా రోటేటింగ్ ఎడ్డీ కరెంట్ డైనోమోమీటర్ సెటప్, అనోకొయిక్ రూం, బంప్ టెస్టింగ్, ఈఏంసీ, ఈఏంఐ ఛాంబర్, హైస్పీడ్ టోయింగ్ ట్యాంకు, ఇన్స్ట్రుమెంటేషన్ రాడార్ కేంద్రం, నాగార్జున సాగర్ లేక్ టెస్ట్ సదుపాయాలను సీనియర్ శాస్త్రవేత్తలు నేరుగా పర్యవేక్షిస్తారు.
సముద్రగర్భంలో వినియోగించే ఆయుధాలు
సముద్ర గర్భం నుంచి ప్రయోగించే మైన్లు, టోర్పెడోలు, అగ్ని మాపక విధానాలు, వెపన్ లాంచర్లు, టార్గెట్లు, డెకాయ్ లు వంటివి అభివృద్ధి చేసి నౌకాదళాన్ని స్వయం సమృద్ధి చేయడంలో ఎన్ఎస్టీఎల్ది ప్రధాన పాత్ర. ఆధునిక ఆయుధాల రూపకల్పన చేసి రక్షణ రంగానికి అందించడం ఎన్ఎస్టీఎల్ మరో లక్ష్యం. తేలికపాటి, బరువు రకం టార్పెడోలను, మైన్లు, డెకాయి వంటివి అభివృద్ది కోసం నిత్యం పరిశోధనలు జరుగుతూనే ఉన్నాయి. నీటిలో ఉపయోగించగల ఆయుధాలు తయారీ, అనుబంధ పరికరాల రూపకల్పన ఈ ప్రయోగశాలలో రూపుదిద్దుకున్నవే.
95 శాతం దేశీయ వస్తువులే
నేవీకి చెందిన నౌకకు దేశంలో తొలిసారిగా ఇన్స్ట్రుమెంటేషన్ రాడార్ ఆర్సీఎస్ రేంజింగ్‌ అమర్చిన ఘనత విశాఖ ఎన్ఎస్టీఎల్దే. యుద్ధ నౌకల డెక్‌లపై ఇంజన్ల రొద... నావికులకు ఇబ్బంది కలిగించకుండా ఉండేలా రెండు దశల మౌంటనీరింగ్‌ విధానం రూపుదిద్దుకుందీ ఇక్కడే. భారత నౌకాదళం కోసం తయారు చేసే టోర్పెడోల్లో 95శాతం దేశీయ వస్తువులనే వాడటంతో.... దిగుమతికయ్యే ఖర్చులో ఆరోవంతులోనే వీటి రూపకల్పన జరుగుతోంది. నీటిలో నిర్దిష్ట లక్ష్యాన్ని ఛేదించేందుకు ఈ టోర్పెడోలను అసమానంగా రూపొందించారు.