విధుల్లో నిర్లక్ష్యం.. విశాఖ సైబర్​ క్రైం సీఐ, ఎస్సైపై వేటు

విధి నిర్వహణలో నిర్లక్ష్యం వహించినందుకు విశాఖ సైబర్​ క్రైం సీఐ గోపీనాథ్​, ఎస్సై రవికుమార్​ను సీపీ ఆర్కే మీనా సస్పెండ్​ చేశారు. బాధితుల ఫిర్యాదులను తీసుకోవడంలో ఉదాసీన వైఖరి సహా తిరిగి వారినే బెదిరించారన్న ఆరోపణలపై విచారణ అనంతరం సీపీ వారిపై చర్యలు తీసుకున్నారు.

బాధితుల ఫిర్యాదుపై సరిగా స్పందించకుండా తిరిగి వారినే బెదిరించారన్న ఆరోపణలు రుజువైన కారణంగా.. విశాఖ సైబర్​ క్రైమ్​ సీఐ గోపీనాథ్​, ఎస్సై రవికుమార్​లను నగర సీపీ ఆర్కే మీనా​ సస్పెండ్​ చేశారు. సైబర్​ క్రైమ్​ పోలీసుల కారణంగా తాము మరింత కష్టాల్లోకి కూరుకుపోయామన్న బాధితుల ఫిర్యాదులపై విచారణ చేయించిన అనంతరం చర్యలు తీసుకున్నారు.

వివరాలివి

విశాఖ నగరానికి చెందిన ఓ వ్యక్తి.. డేటింగ్‌ అంతర్జాల చిరునామా నిర్వాహకుల మాటలు నమ్మి రూ.11.60 లక్షలు చెల్లించాడు. ఆ మొత్తాన్ని తిరిగివ్వాలని కోరగా.. రూ.6 లక్షలిస్తేనే పూర్తి సొమ్ము ఇస్తామని సంస్థ యాజమాన్యం మెలిక పెట్టింది. దీనిపై బాధితుడు సైబర్​ క్రైంకు ఫిర్యాదు చేయగా.. సీఐ గోపీనాథ్‌ స్వీకరించలేదు. పైగా డేటింగ్‌ సంస్థకు డబ్బులెందుకు ఇచ్చావని.. కేసులో ఏ1గా చూపిస్తానంటూ సీఐ బెదిరించారని బాధితుడు ఆరోపించాడు. ఈ విషయంపై ఉన్నతాధికారులకు ఫిర్యాదు చేశాడు.

బాధితుని ఫిర్యాదును తీసుకోలేదు

ఎంవీపీ కాలనీకి చెందిన ఓ వ్యక్తి ఆన్‌లైన్లో ఓ సంస్థకు చెల్లించాల్సిన మొత్తాన్ని మరో సంస్థకు పొరపాటున చెల్లించారు. ఈ విషయంపై సైబర్‌ క్రైం పోలీసులకు ఫిర్యాదు చేయగా.. ఇలాంటివి తీసుకోవటం లేదని సీఐ బదులిచ్చారు. ఈ క్రమంలో బాధితుడు ఉన్నతాధికారులను ఆశ్రయించాడు. తాజాగా మరికొన్ని ఆరోపణలపైనా ఉన్నతాధికారులు ప్రాథమిక విచారణ చేసి వాస్తవాలేనని తేల్చారు. ఈ నేపథ్యంలో సీఐ, ఎస్సైలపై సీపీ చర్య తీసుకున్నారు. విధి నిర్వహణలో నిర్లక్ష్యం వహిస్తే సహించేది లేదని హెచ్చరించారు.

మహిళ ఫిర్యాదును పట్టించుకోలేదు

ఓ గుర్తు తెలియని వ్యక్తి తన భర్తకు లేనిపోనివి చెప్పి సంసారంలో చిచ్చు పెడుతున్నారని ఫిర్యాదు చేస్తే సీఐ గోపీనాథ్‌ పట్టించుకోలేదని ఓ మహిళ ఉన్నతాధికారుల వద్ద ఆవేదన వ్యక్తం చేసింది. ఈ ఘటనపై ఉన్నతాధికారులు విచారణకు ఆదేశించారు.

ఇదీ చూడండి: