TENSION: ఊరు మునుగుతుందోమోనన్న టెన్షన్​లో గ్రామస్థులు

భారీ వర్షాలతో ఆ ఊరి ప్రజలకు నిద్ర పట్టడం లేదు. ఏ క్షణం ఏం జరుగుతుందోనన్న భయం వారిని వెంటాడుతోంది. గతంలో ఉన్న పరిస్థితి నుంచి బయటపడ్డామని ఆనందపడ్డా.. అది ఎంతో కాలం లేకుండాపోయిందని వాపోతున్నారు. అధికారులు స్పందించి చర్యలు చేపట్టాలని కోరుతున్నారు. ఇంతకు వాళ్ల భయమెంటి? ఎందుకా టెన్షన్​.

గత రెండు రోజులుగా కురుస్తున్న వర్షాలతో వాగులు, వంకలు పొంగి పొర్లుతున్నాయి. లోతట్టు ప్రాంతాలు జలమయమయ్యాయి. పలు గ్రామాల మధ్య రహదారులపైకి నీరు చేరడంతో రాకపోకలకు అంతరాయం ఏర్పడింది. దీంతో ప్రజలు ఎన్నో ఇబ్బందులు ఎదుర్కొంటున్నారు.

విశాఖ జిల్లాలో కురుస్తున్న వర్షాలకు రాయవరం మండలం సోముదేవుపల్లి వద్ద వరాహ గట్టు కొతకు గురైంది. భారీ వర్షాలకు ఎగువనుంచి వస్తున్న వరదతో నది ఉగ్ర రూపం దాల్చింది. గతేడాది ఇలాంటి సమయంలో గట్టు చాలా వరకు కొట్టుకుపోయింది. పాయకరావుపేట ఎమ్మెల్యే బాబురావు చొరవ తీసుకుని అధికారులతో మాట్లాడి గట్టు వేయించారు. అది ప్రస్తుత వర్షాలతో మళ్లీ అదే పరిస్థితికి చేరింది.

రెండు రోజులుగా కురుస్తున్న వర్షాలకు ఏటిగట్టు కోతకు గురైంది. దీంతో ప్రజలకు మళ్లీ టెన్షన్​ మొదలైంది. ఎప్పుడు వరద వచ్చి ఊరిపై పడుతుందోనన్న ఆందోళన వారిలో మొదలైంది. ఏ క్షణం ఏం జరుగుతుందోనన్న భయంతో ప్రాణాలు చేతిలో పెట్టుకుని బిక్కుబిక్కుమంటూ బతుకుతున్నారు. అధికారులు స్పందించి చర్యలు తీసుకోవాలని కోరుతున్నారు.

ఇదీ చదవండీ..WEATHER ALERT: అల్పపీడన ప్రభావం.. రాగల మూడు రోజుల్లో వర్షాలు