గర్భిణులు, బాలింతలకు కుళ్లిన కోడిగుడ్లు ఇవ్వటమేంటి?

గర్భిణులు, బాలింతలకు పౌష్టికాహారం ఎంత ముఖ్యమో మనకి తెలియనిది కాదు. వారికోసం ప్రభుత్వాలు... పౌష్టికాహారాన్ని అంగన్​వాడీ కేంద్రాల ద్వారా సప్లై చేస్తున్నాయి. కానీ అందులో కుళ్లిన కోడిగుడ్లు దర్శనమిస్తున్నాయి. అనకాప్లలిలోని కుళ్లిన గుడ్లు సరఫరా చేస్తున్నారని బాధితులు వాపోతున్నారు.

విశాఖ జిల్లా అనకాపల్లి అంగన్​వాడీ కేంద్రంలో కుళ్లిన కోడిగుడ్లు బాలింతలకు ఇవ్వడంపై పలువురు నిరసనలు తెలిపారు. అనకాపల్లి పట్టణం ధోబీ కాలనీలోని 2 అంగన్​వాడీ కేంద్రాల్లో... బాలింతలు, గర్భిణులకు కుళ్లిన కోడిగుడ్లు ఇచ్చారంటూ ఆందోళన వ్యక్తం చేశారు. ఇలాంటివి సరఫరా చేయడం వల్ల తమ ఆరోగ్యాల పరిస్థితి ఏంటని ప్రశ్నిస్తున్నారు.

ఈ విషయమై అంగన్​వాడీ కార్యకర్తని ప్రశ్నించగా నిర్లక్ష్యంగా సమాధానం ఇచ్చారని వాపోతున్నారు. ఘటనపై ఐసీడీఎస్ అర్బన్ ప్రాజెక్టు అధికారి మేరీ సువార్తను వివరణ కోరగా... లాక్​డౌన్ సమయంలో వచ్చిన కోడిగుడ్లలో కొన్ని పాడైపోయినట్లు తమ దృష్టికి వచ్చిందన్నారు. వీటిని వెంటనే మార్చి సమస్యను పరిష్కరిస్తామని చెప్పారు.

ఇదీ చదవండి:అంతర్రాష్ట్ర బస్సు సర్వీసులపై చర్చ..తొలివిడతో 256 సర్వీసులు