'వైభవంగా సింహాచలం అప్పన్న చందనోత్సవం'

ఉత్తరాంధ్రుల ఆరాధ్య దైవం.. అడిగిన వరాలు వెంటనే ప్రసాదించే స్వామిగా పేరున్న సింహాచలం అప్పన్న స్వామి చందనోత్సవం వైభవంగా నిర్వహించారు. ఉత్సవం సందర్భంగా ఆలయాన్ని సుందరంగా అలంకరించారు.

ఉత్తరాంధ్ర ప్రజల ప్రత్యక్ష దేవదేవుడు, ఏడాది లో ఒక్క సారి మాత్రమే తన నిజ రూప కటాక్ష వీక్షణం ఇచ్చే వరాహ నరసింహ స్వరూపుడు శ్రీ సింహాచల వరాహ లక్ష్మీ నరసింహ స్వామి చందనోత్సవం ఘనంగా జరుగుతోంది. వైశాఖ శుద్ధ తదియ శ్రీ వరాహ లక్ష్మీ నరసింహ స్వామి తన వంటిపై 12 మడుగుల చందనపు పూత తొలగించి తన నిజరూపాన్ని భక్తులకు దర్శించి భాగ్యం ఇస్తున్నాడు. వంశ పారంపర్యంగా పూసపాటి వంశస్తులు తెల్లవారుజామున 2 గంటల సమయంలో తొలి చందనం సమర్పించగా ,అనంతరం భక్తులకు దర్శనం కల్పించారు.

ఉపముఖ్యమంత్రి చినరాజప్ప, ఎంపీ అవంతి శ్రీనివాసరావు, కేంద్ర మాజీ మంత్రి ఎం ఎం పల్లంరాజు, శాసన సభ్యుడు బండారు సత్యనారాయణ, గౌతు శ్యామ్ సుందర్ శివాజీ .గణబాబు, పిలా గోవిందు, అనిత... స్వామిని దర్శనం చేసుకున్నారు. శాసన మండలి సభ్యుడు పి వి యన్ మాధవ్ , రాష్ట్ర పోలీస్ డిజిపి ఆర్పీ ఠాగూర్, పోలీస్ కమిషనర్ మహేష్ చంద్ర లడ్డతో పాటు క్రికెటర్ వివిఎస్ లక్ష్మణ్ ప్రత్యేక పూజలు పాల్గొన్నారు. సుమారూ 3 లక్షల మంది స్వామి దర్శనం చేసుకునేలా ఏర్పాట్లు చేశారు.

చందనోత్సవం సందర్భంగా ఆలయం సర్వాంగ సుందరంగా ముస్తాబైంది. విద్యుత్ దీప కాంతులతో వెలిగిపోయింది. రకరకాలు పూలతో ఆలయ ప్రాంగణాన్ని అలంకరించారు. ఎటు చూసినా కంటికి ఇంపుగా... పచ్చని తోరణాలతో అద్భుతంగా తీర్చి దిద్దారు.

ఈ వేడుక కోసం దేవాదాయ శాఖ అన్ని ఏర్పాట్లు చేసింది. దాదాపు 3లక్షల మంది భక్తులు స్వామి దర్శించుకునే విధంగా బారిగేట్లు, క్యూ లైన్లు ఏర్పాటు చేసింది. ఎండలు అధికంగా ఉండటంతో ప్రాంగణంలో చలువ పందిళ్లు వేశారు. మజ్జిగ ,మంచినీళ్ల సరఫారా చేస్తున్నారు. భక్తులను కొండ కింద నుంచి పైకి తరలించడానికి ఆర్టీసీ బస్సులను ఉచితంగా నడపుతున్నారు. ఎలాంటి అవాంఛనీయ ఘటనలో జరగకుండా అధికారులు 600మంది పోలీసులను నియమించారు.

ఇవీ చూడండి-వామ్మో ఫొని.. వెళ్తూ వెళ్తూ మంట పెట్టింది!