విశాఖ నుంచి సింగపూర్కి... ఇక స్కూట్లో..! విశాఖ నుంచి ఒక్కటొక్కటిగా విమాన సర్వీసులు నిలిపిపోతున్న తరుణంలో...సింగపూర్ విమానసంస్థ స్కూట్ ఎయిర్ లైన్స్ విశాఖ నుంచి సర్వీసులు ప్రారంభించేందుకు ముందుకొచ్చింది. సింగపూర్ ఎయిర్ లైన్స్ సర్వీసుల స్థానంలో స్కూట్ విమానం విశాఖ-సింగపూర్ మధ్య ఎగరనుంది. విశాఖ నుంచి సింగపూర్కు ప్రయాణికుల తాకిడి ఎక్కువగా ఉంటుంది. ఈ అవకాశాన్ని మరింత సమర్థంగా వినియోగించుకునే దిశగా స్కూట్ సంస్థ అడుగు వేసింది. ప్రస్తుతం సింగపూర్ విమానం వారానికి మూడు రోజులు మాత్రమే అందుబాటులో ఉంటుంది. అయితే స్కూట్ విమానం మాత్రం మంగళవారం, గురువారం మినహా మిగిలిన రోజుల్లో ప్రయాణికులకు సేవలు అందించనుంది.
స్కూట్ ఎయిర్ లైన్స్ విమానం సీట్ల సంఖ్య కూడా 180 వరకు ఉంటుందని సంస్థ ప్రతినిధులు చెబుతున్నారు. ఈ విమాన ప్రయాణ టిక్కెట్టు ధర సామాన్యులకు అందుబాటులో ఉంటుందంటున్నారు. పర్యాటకులను ఆకర్షించే దిశగా స్కూట్ ఎయిర్ లైన్స్ ఇరుదేశాల పర్యాటక ఆకర్షణలకు ప్రచారం కల్పించనుందని అంటున్నారు. అక్టోబర్ 27 నుంచి స్కూట్ ఎయిర్ లైన్స్ విమాన సర్వీసులు అందుబాటులోకి రానున్నాయి. సుమారు నాలుగుగంటల ప్రయాణ సమయంతో విశాఖ, సింగపూర్ మధ్య స్కూట్ విమానం పయనించనుంది.
