చెస్‌ పండితుల్ని సైతం ఆశ్చర్యపరిచేలా తొమ్మిదేళ్లకే అంతర్జాతీయ రేటింగ్‌

Records Achieved by Visakhapatnam Women in Chess Game : కొన్నేళ్లుగా చెస్‌ వైపు అడుగులేస్తోన్న నవతరం సంఖ్య పెరుగుతోంది. ప్రపంచ దిగ్గజాలకి సైతం షాక్ ఇచ్చే స్థాయిలో ప్రతిభ కనబరుస్తున్నారు మన యువతరం. ఆ జాబితాలోకి మరో తెలుగు తేజం చేరింది. తండ్రి మార్గదర్శకత్వంలో.. పిన్న వయసులోనే రికార్డు ప్రదర్శనలతో ముందుకు సాగుతోంది విశాఖ యువతి. అంతర్జాతీయ చెస్‌ ఒలంపియాడ్‌కూ ఎంపికై.. భారతజట్టుకు ప్రాతినిధ్యం వహించింది. ప్రపంచ చెస్‌ ర్యాంకింగ్‌లో తొలి పది స్థానాల్లో నిలవడమే లక్ష్యంగా శ్రమిస్తున్నానంటోంది. మరి ఈ యువ ప్రతిభావంతురాలెవరో తెలుసుకుందామా?

Records Achieved by VisakhapatnamWomen in Chess Game :చదరంగంలో రాణించాలన్న ఆమె అభిలాషకు వెన్నంటే నిలిచాడు తండ్రి. ప్రభుత్వ ఉద్యోగం సైతం వదులుకుని.. అన్ని రకాలుగా ప్రోత్సహిస్తున్నారు. అలా తండ్రి శిక్షణతో తన ప్రతిభకు పదును పెట్టుకున్న ఆ అమ్మాయి.. జూనియర్‌ విభాగంలో అనేక పతకాలు సాధించింది. చెస్‌ పండితుల్ని సైతం ఆశ్చర్యపరుస్తూ.. తొమ్మిదేళ్లకే అంతర్జాతీయ రేటింగ్‌నూ పొందింది. అంతర్జాతీయ టోర్నీల్లోనూ తనదైన ప్రతిభ కనబరుస్తూ ముందుకు సాగుతోంది.

Visakhapatnam Girl Sahithi Achievements in Chess Game :సాహితీ వర్షిణిది విశాఖ. తండ్రి లోకేశ్వర్‌రావు హెచ్​పీసీఎల్ లో ఉద్యోగిగా పనిచేసేవారు. తల్లి జయశ్రీ. సాహితీ సోదరి ఫల్గుణి కూడా చెస్‌ క్రీడాకారిణే. ఎనిమిది ఏళ్లప్పుడు నాన్న, అక్క చెస్‌ ఆడటం చూశాక.. తనకు ఆ దిశగా ఆసక్తి కలిగిందంటోంది వర్షిణి. కుమార్తె ఇష్టం చూసి తల్లిదండ్రులు వెన్నుదన్నుగా నిలిచారు. స్వతహాగా చెస్‌ ప్రియుడైన తండ్రి లోకేశ్వర్‌.. కుమార్తె ఇష్టం, నిబద్ధత గమనించి తానే కోచ్‌గా మారి ఆటలో మెళకువలు నేర్పించారు.

ఇంతితై వటుడింతై అన్నట్టు అనతికాలంలోనే అండర్‌ టెన్ విభాగంలో ప్రపంచస్థాయి టోర్నీల్లో పాల్గొంది ఈ యువతి. వివిధ దేశాలతో పోటీపడి స్వర్ణ పతకాలూ సాధించింది. ఆటలో కుమార్తె మరింత ప్రగతి సాధించాలని హెచ్​పీసీఎల్ లో ఉద్యోగాన్నీ వదులుకున్నాడు తండ్రి లోకేశ్వర్‌. వివిధ దేశాల టోర్నీలకు వెళ్లేందుకు ఆర్థిక ఇక్కట్లు కలిగినా.. అవేవి వర్షిణి ఆటపై ప్రభావం చూపలేకపోయాయి.

Chess Player Sahithi Achievements :జలంధర్‌లో జరిగిన జాతీయ టోర్నీలో పోటీపడి రెండవ స్థానం సాధించింది సాహితీ. ఉజ్బెకిస్థాన్‌లో అండర్‌ టెన్‌ ఆసియా, దిల్లీ కామన్వెల్త్‌ యూత్‌ విభాగంలోబంగారు పతకాలుసొంతం చేసుకుంది. బ్రెజిల్‌లో జరిగిన వరల్డ్‌ ఛాంపియన్‌షిప్‌లో కొద్దిలో కాంస్యం చేజారింది. ఐనా రెట్టించిన ఉత్సాహంతో థాయ్‌లాండ్‌ ఆసియా పోటీల్లో అండర్‌12లో ఆరు స్వర్ణాలు ఒడిసిపట్టింది. ఎప్పటికప్పుడు ర్యాంకింగ్‌ను మెరుగుపర్చుకుంటూ విజయ పరంపర కొనసాగిస్తోంది.

2018లో అండర్ 12 ఆసియా యూత్ టోర్నీలో వ్యక్తిగత క్లాసికల్, ర్యాపిడ్ ఈవెంట్లలో రెండు స్వర్ణాలు గెలుపొందింది సాహితీ. జూనియర్‌ విభాగంలో ఆసియా ఛాంపియన్‌షిప్‌లోవరసగా తొమ్మిది స్వర్ణాలు, కాంస్యం దక్కించుకుంది. హంగేరీలో జరిగిన బ్లిట్జ్‌ టోర్నీలోనూ ఛాంపియన్‌గా నిలిచింది. మొత్తంగా తొమ్మిది అంతర్జాతీయ పతకాలతో పాటుగా.. నాలుగు ఫిడే టైటిళ్లు, ఆసియా, కామన్ వెల్త్ బాలికల ఛాంపియన్‌షిప్‌లను సొంతం చేసుకుంది.

Achievements of Visakha Women International level : జర్మనీ, స్విట్జర్లాండ్, ఆర్మేనియా తదితర దేశాల్లో గ్రాండ్ మాస్టర్లనూ ఢీకొనడమే కాదు.. ఫర్కాస్ బ్లిట్జ్‌లో ముగ్గురు గ్రాండ్ మాస్టర్లకు షాకిచ్చింది సాహితీ. జర్మనీ, ఆర్మేనియాలో ఉత్తమ జూనియర్ క్రీడాకారిణిగా.. స్విస్ బీల్ గ్రాండ్ మాస్టర్ల టోర్నీలో రెండోసారి ఉత్తమ క్రీడాకారిణిగా నిలిచింది. అత్యుత్తమ ఫామ్‌లో ఉన్న సమయంలో కరోనా రావడంతో.. 13 ఏళ్లకే గ్రాండ్‌మాస్టర్‌ అయ్యే అవకాశం కోల్పోయానంటోంది సాహితి. ఐనా అంతర్జాతీయ చెస్‌ ఒలింపియాడ్‌లో భారత జట్టు తరపున ప్రాతినిధ్యం వహించడం ఉత్సాహానిచ్చిందని చెబుతోంది.

సాహితీ సాధిస్తున్న వరస విజయాలు మాకు ఆనందం కలిగిస్తున్నాయి. ఆర్థిక కష్టాలు ఎదురైనా సంవత్సరానికి 37 లక్షల రూపాయలకుపైగా ఖర్చవుతున్నా.. అప్పు చేసి మరీ విదేశీ టోర్నీలకు తీసుకెళ్తున్నాం. ఎన్ని ఇబ్బందులొచ్చినా కుమార్తె తపనను చూసి ఆటలో ఎదిగేలా ప్రోత్సహిస్తున్నాం. -సాహితీ తల్లిదండ్రులు లోకేశ్వర్, జయశ్రీ

ఫిడే ఉమెన్ ఇంటర్నేషనల్ మాస్టర్ టైటిల్ సాధించిన తొలి యువతిగా ఘనత సాధించింది సాహితీ. ఆటలో ఉన్నత శిఖరాలు అందుకునేలా కుటుంబం అండదండగా ఉంటోందని.. భవిష్యత్తులో ప్రపంచ చెస్‌ ర్యాంకింగ్‌లో పదిలోపు ర్యాంకును సాధిస్తానని నమ్మకం ధీమా వ్యక్తం చేస్తోంది.