పాడేరు మండలం దేవాపురం పంచాయతీ కూడా అలాంటిదే. అత్యంత ఎత్తయిన కొండల మీద ఉంటుంది. ఆ పరిధిలోని హనుమంతపురంలో నివాసం ఉండే ఓ నిండు గర్భిణీకి... పురిటి నొప్పులు వచ్చాయి. ఇక ఏమాత్రం ఆలస్యం చేయకుండా నలుగురు కుటుంబ సభ్యులు కలిసి పోరాటం ప్రారంభించారు. డోలీ కట్టి గర్భిణీని మోసుకుంటూ... కొండ మార్గాన సాహసోపేతంగా అడుగులేశారు. ఏమాత్రం అడుగు తడబడినా ప్రాణగండం తప్పదనేలా ఉన్న చిత్తడి కొండలపై... అత్యంత జాగ్రత్తగా ముందుకు సాగారు. అలా కొన్ని కిలోమీటర్ల మేర పయనించి... దూరాన ఉన్న మాడుగుల ప్రాథమిక ఆరోగ్య కేంద్రానికి తరలించారు.
గిరిజన గూడేల నుంచి డోలీ కట్టి గర్భిణీలను తరలించడం నిత్యకృత్యమే. అయితే హనుమంతపురం లాంటి చోటు నుంచి వెళ్లడం మాత్రం... ఒకరకంగా పర్వతం మీదినుంచి దిగినట్లే. అతిపెద్ద చెట్లు, ఎటుచూసినా గుబురు పొదలు, పెద్దపెద్ద బండరాళ్లతో ప్రమాదకరంగా ఉండే కొండలపై నుంచి కిందికి రావాలంటే... కాసేపటికే కాళ్లు పట్టేస్తాయి. అంత కష్టతరమైన ప్రాంతం నుంచి నిండు చూలాలిని మోసుకెళ్లడమంటే... అంతకుమించిన సాహసం మరొకటి ఉండదేమో. అయినా పట్టు సడలకుండా, అకుంఠిత దీక్షతో మాడుగుల చేరుకున్న గిరిపుత్రులు... నిజంగా సాహస వీరులే.