శనివారం ఉదయం విశాఖ ప్లాంట్లో స్థితిగతులను పునరుద్ధరించినట్లు ఎల్జీ పాలిమర్స్ కంపెనీ ఒక ప్రకటనలో తెలిపింది. లాక్డౌన్ పాక్షికంగా సడలించిన అనంతరం సంస్థ కార్యకలాపాలను పునఃప్రారంభించడానికి ప్రయత్నించిన తర్వాత ప్లాంట్ నుంచి గ్యాస్ లీకై ప్రమాదం జరిగిందని పేర్కొంది. స్టైరీన్ మోనోమర్ (ఎస్ఎమ్) స్టోరేజ్ ట్యాంక్ నుంచి ఆవిరి లీక్ అవ్వడమే ఈ సంఘటనకు కారణమని తమ ప్రాథమిక పరిశోధనలు సూచిస్తున్నట్లు సంస్థ ప్రకటనలో స్పష్టం చేసింది.
ఎల్జీ యాజమాన్యం ప్రకటనలో సారాంశం
- భవిష్యత్తులో ఇలాంటి ఘటనలు పునరావృతం కాకుండా నిరోధించడానికి సంబంధిత అధికారులతో కలిసి పనిచేయడానికి తమ యాజమాన్యం కట్టుబడి ఉంది.
- తమ బృందాలు ప్రభుత్వంతో కలిసి పగలు, రాత్రి పని చేస్తున్నాయి. ఈ దుర్ఘటన వల్ల కలిగిన నష్టాన్ని అంచనా వేయడానికి, వెంటనే అమలు చేయగల సమర్థవంతమైన సంరక్షణ ప్యాకేజీని అందించేలా చర్యలను రూపొందించడానికి మేం కృషిచేస్తున్నాం.
- బాధితులు, వారి కుటుంబాల సమస్యలు పరిష్కరించడానికి, వారికి సహాయం అందించడానికి ప్రత్యేక టాస్క్ఫోర్స్ ఏర్పాటు చేశాం.
- అన్ని కుటుంబాలను త్వరలో సంప్రదించి.. మృతుల కుటుంబాలకు, బాధితుల వైద్య ఖర్చులకు సహాయం అందించాల్సిన బాధ్యత తమపై ఉంది.
- స్థానిక కమ్యూనిటీలకు దోహదపడే దీర్ఘకాలిక సహాయ కార్యక్రమాలను మేము చురుకుగా అభివృద్ధి చేస్తాం.
- ఈ సంఘటనతో బాధపడుతున్న ప్రతి ఒక్కరికీ ఎల్జీ పాలిమర్స్ ఇండియా సంస్థ ప్రగాఢ సానుభూతి తెలుపుతున్నాం.
- బాధితులను రక్షించడానికి, వారు కోలుకోవడానికి కష్టపడి పనిచేసిన అధికారులు, పోలీసులు, ప్రతి సభ్యునికి మేము హృదయపూర్వక కృతజ్ఞతలు తెలియజేస్తున్నాం.. అని సంస్థ ప్రకటనలో పేర్కొంది.