కౌలాలంపూర్​ నుంచి విశాఖ చేరుకున్న భారతీయ విద్యార్థులు

నిన్నటి నుంచి కౌలాలంపూర్​ విమానాశ్రయంలో పడిగాపులు పడ్డ 185 భారతీయ విద్యార్థులు ఎట్టకేలకు విశాఖ చేరుకున్నారు. విద్యార్థుల పరిస్థితిని ఆయా రాష్ట్ర ప్రభుత్వాలు కేంద్రం దృష్టికి తీసుకెళ్లాయి. కేంద్రం స్పందించి, విద్యార్థులను స్వదేశానికి తీసుకువచ్చేందుకు ఏర్పాట్లు చేసింది.

కరోనా ప్రభావంతో భారత్‌కు వచ్చే విమానాలు రద్దు కావటంతో ఫిలిప్పీన్స్‌లోని మనీలా విమానాశ్రయంలో పలువురు తెలుగు విద్యార్థులు చిక్కుకుపోయారు. గత 40 గంటలుగా సరైన నిద్రాహారాలు లేక.. వారంతా పడిగాపులు కాస్తున్నారు. మలేసియాలోని కౌలాలంపూర్‌ నుంచి 185 మంది విద్యార్థులు.. విశాఖ విమానాశ్రయానికి చేరుకున్నారు. వారిలో తెలుగు రాష్ట్రాలతో పాటు ఇతర రాష్ట్రాల వారూ ఉన్నారు. మనీలాలో మాత్రం ఇంకా ఆంధ్రప్రదేశ్‌, తెలంగాణకు చెందిన సుమారు 80 మంది విద్యార్థులు నిలిచిపోయారు. వీళ్లంతా కౌలాలంపూర్ మీదుగా భారత్‌కు వచ్చేందుకు ఎయిర్‌ ఏసియా విమానంలో టిక్కెట్లు బుక్‌ చేసకున్నారు. కానీ.. భారత్‌కు వచ్చే విమాన సర్వీసులు మంగళవారం నుంచి రద్దు చేయటంతో తెలుగు విద్యార్థులు విలవిల్లాడుతున్నారు. వీరిలో కర్నూలు, చిత్తూరు, ప్రకాశం, గుంటూరు, అనంతపురం సహా తెలంగాణలోని హైదరాబాద్‌, వరంగల్‌, ప్రాంతాల వాసులూ ఉన్నారు.

మలేసియాలోని కౌలంపూర్‌ విమానాశ్రయంలో చిక్కుకుపోయిన భారతీయ విద్యార్థులు.. ఎట్టకేలకు స్వదేశానికి చేరుకున్నారు. వీరిలో 150 మంది వరకూ తెలుగు విద్యార్థులే ఉన్నారు. రెండు విమానాల్లో వీరిని భారత్‌కు తీసుకొచ్చారు. దక్షిణాది రాష్ట్రాల వారిని విశాఖపట్నానికి, ఉత్తరాది వారిని దిల్లీకి తీసుకువచ్చారు.బుధవారం సాయంత్రం విశాఖ చేరుకున్న విమానంలో 91 మంది ఆంధ్రప్రదేశ్‌, ఏడుగురు తెలంగాణ, 78 మంది తమిళనాడుకు చెందినవారు కాగా... మిగిలినవారంతా మహారాష్ట్ర, కేరళ, కర్ణాటక, ఒడిశా, గోవా వాసులు ఉన్నారు.

కౌలాలంపూర్ నుంచి విశాఖకు వచ్చిన విద్యార్థులకు వైద్యులు హోమ్ ఐసోలేషన్‌ సూచించారు. ఎయిర్ ఏసియా విమానం ద్వారా 185 మందిని తీసుకురావటంపై ప్రయాణికులు, వారి కుటుంబీకులు సంతోషం వ్యక్తం చేశారు. ప్రత్యేక అంబులెన్సులు, ప్రైవేటు వాహనాలను ఏర్పాటు చేసి కరోనా లక్షణాలు కలిగి ఉన్న వారు ఉంటే... వారిని తరలించేందుకు ఏర్పాట్లు చేశారు. ప్రయాణికులందరికీ ధర్మల్ స్కానింగ్ పరీక్షలు నిర్వహించగా.. ఎవరికీ కరోనా లక్షణాలు లేవని వైద్యారోగ్యశాఖ ధృవీకరించింది. అందుకే ప్రత్యేక వాహనాల్లో వారిని.. ఆయా రాష్ట్రాలకు చేర్చే ఏర్పాట్లు చేశామని వైద్యులు చెబుతున్నారు.

కౌలాలంపూర్‌లో చిక్కుకున్న తెలుగు విద్యార్థులను త్వరతగతిన భారత్‌కు రప్పించిన కేంద్ర విదేశీ వ్యవహారాలశాఖ మంత్రి జై శంకర్‌కు తెలుగుదేశం అధినేత చంద్రబాబు కృతజ్ఞతలు తెలిపారు. కేంద్రం చేసిన సాయాన్ని విద్యార్థులు మరువలేరని పేర్కొన్నారు.

ఇవీ చదవండి:కరోనా వ్యాప్తి నివారణకు ప్రభుత్వం ముందస్తు చర్యలు