యాంటీ సబ్మెరైన్ వార్ఫేర్ తరగతిలో చివరిదైన ఐఎన్ఎస్ కవ్రత్తి గురువారం భారత నౌకాదళంలోకి చేరనుంది. ఆర్మీ చీఫ్ జనరల్ మనోజ్ ముకుంద్ నరవణే ఈ నౌకను నౌకాదళంలో ప్రవేశపెట్టే కార్యక్రమం నిర్వహించనున్నారు. నౌకా దళంలో ప్రాజెక్టు 28 కమోర్ట తరగతి కింద నాలుగు నౌకలు దేశీయంగానే రూపొందించారు. వీటిని దేశీయ డిజైన్‌తో రూపొందించిన ఈ సబ్మెరైన్ వార్ఫేర్..... డైరెక్టరేట్ ఆఫ్ నేవల్ డిజైన్ ఇచ్చిన ప్రమాణాలతో నిర్మించారు.ఈ నౌకలను ఆత్మనిర్భర్ భారత్ కింద కోల్కతాలోని గార్డెన్ రీచ్ షిప్ బిల్డర్స్ రూపొందించింది.
ప్రత్యేకతలు
యాంటీ సబ్మెరైన్ వార్ఫేర్ తరగతిలో 2014లో కమోర్ట, 2016లో కడ్మట్, 2017లో కిల్తన్ నౌకలను నౌకాదళంలో ప్రవేశపెట్టారు. ఈ తరగతిలో ఐఎన్ఎస్ కవ్రత్తి చివరిది. వీటివల్ల దేశీయంగా మన రక్షణ దళాలకు అదనపు ఆయుధ సంపత్తి సమకూరింది. ఈ నౌకల్లో అత్యున్నత స్థాయి ఆయుధాలను గుర్తించే సెన్సార్లు ఉన్నాయి. జలాంతర్గాముల కదలికలను పసిగట్టగలిగే అత్యాధునిక వ్యవస్థలు ఈ యుద్ధ నౌకలో ఉన్నాయి. దీర్ఘకాలం సముద్రంపై పోరాడగల సత్తా ఈ నౌకల సొంతం. సముద్రంపై ఈ నౌక సత్తాను పలుమార్లు విజయవంతంగా పరీక్షించారు. అన్ని రకాల పరీక్షలను తట్టుకుని ఈ నౌకలు తమ సామర్థ్యాన్ని రుజువు చేసుకున్నాయి.
ఇదీ చదవండి: విజయవాడ దుర్గగుడి వద్ద విరిగిపడిన కొండచరియలు