ఉద్యోగాలు కల్పిస్తామని చెప్పి డబ్బులు వసూలు చేసి మోసానికి పాల్పడిన ఓ వ్యాపారిపై కేసు నమోదు చేసినట్లు విశాఖ జిల్లా పెందుర్తి పోలీసులు వెల్లడించారు. సీఐ తెలిపిన వివరాల ప్రకారం... విజయవాడకు చెందిన సామినేని రామకృష్ణ అనే వ్యక్తి పాపయ్యరాజు పాలెంలో నివాసం ఉంటున్నాడు. అతను చినముషిడివాడలో ఆర్కే ట్రేడర్స్ పేరిట వ్యాపారం నిర్వహించేవాడు. ఆ ప్రాంతానికి చెందిన 16మంది యువకులకు.. ఉద్యోగం ఇచ్చి, నెలకు రూ.40 జీతం ఇస్తానని చెప్పాడు. అందుకుగాను వారి వద్ద నుంచి రూ.2లక్షలు వసూలు చేశారు.
సరుకుల విక్రయానికి సంబంధించి ఉద్యోగం ఇచ్చి.. కొన్నాళ్లు నెలకు రూ.25వేలు మాత్రమే జీతమిచ్చాడు. తన వద్ద డిస్ట్రిబ్యూటర్లుగా చేరితే మంచి ఆదాయం పొందవచ్చని ఆశ చూపాడు. తన వద్ద తక్కువ ధరకు వస్తువులు కొని... ఎక్కువ ధరకు విక్రయించవచ్చని నమ్మించాడు. సరుకుల కోసం యువకుల నుంచి మళ్లీ కొంత మొత్తాన్ని డిపాజిట్ చేయించుకున్నాడు. రోజులు గడుస్తున్నా యువకులకు మాత్రం సరుకులు అందలేదు. వారికి ఇవ్వాల్సిన నెలసరి జీతాలు కూడా వ్యాపారి ఇవ్వలేదు. చేసేది లేక బాధితులంతా రామకృష్ణ వద్దకు వెళ్లి ప్రశ్నించారు. దీంతో దుకాణం మూసివేసి వ్యాపారి పరారయ్యాడు.