గృహ నిర్మాణంలో కీలక పాత్ర పోషించే కార్పెంటర్లకు ఎంతో గిరాకీ ఉండేది ఒకప్పుడు. ఫర్నిచర్ దుకాణాలు వచ్చిన తర్వాత వారికి పని తగ్గినా.. ఇప్పటికీ పీస్ రేట్ కార్మికులుగా, కాంట్రాక్ట్ పనివారిగా ఎంతో కొంత ఆదాయం పొందుతున్నారు. అయితే కరోనా కారణంగా వారి బతుకులు పూర్తిగా ఛిద్రమయ్యాయి. పని దొరక్క, ఆదాయం రాక అవస్థలు పడుతున్నారు.
కార్పెంటరీని నమ్ముకుని... రాష్ట్రంలో సుమారు 12 లక్షల కుటుంబాలు జీవనం సాగిస్తున్నాయి. నిర్మాణ రంగం బాగుంటేనే వీరి బతుకులు బాగుంటాయి. ఆర్డర్లు వస్తాయి. చేతిలో ఉలి ఆడుతుంది. కర్రలో కళాత్మకత వెలికి వస్తుంది. కానీ ప్రస్తుతం అంతా తారుమారైంది. కరోనా వల్ల నిర్మాణ రంగంలోనూ నిస్తేజం ఆవరించింది. పని దొరక్క ఆదాయం పుట్టట్లేదని వడ్రంగులు అంటున్నారు. అసంఘటిత రంగంలోని అనేక వర్గాలను ఆదుకునేందుకు ముందుకొస్తున్న ప్రభుత్వం.. తమనూ ఆదుకోవాలంటూ వేడుకుంటున్నారు కార్పెంటర్లు.