పోలీసు కమిషనరేట్‌ పరిధిలో గల పోలీసు జాగిలాల ఆరోగ్య స్థితి, వాటి పని తీరును రాష్ట్ర ఇంటిలిజెన్స్‌ భద్రతా విభాగానికి చెందిన అధికారులు పరిశీలించారు. విశాఖ ఎ.ఆర్‌. ఏడీసీపీ సుబ్రహ్మణ్యం నేతృత్వంలో పోలీసు మైదానంలో జాగిలాల ప్రదర్శన నిర్వహించారు. నిందితుల ఆచూకీ పసిగట్టడం, పేలుడు పదార్థాలను, అనుమానస్పద వస్తువులను వాసన చూసి గుర్తించడం, శిక్షకుల ఆజ్ఞలు పాటిస్తున్నాయా లేదా తదితర అంశాలపై వాటిని పరీక్షించారు.
అత్యవసర సమయాల్లో జాగిలాల తీరు ఎలా ఉంటుందన్నది తిలకించారు. నగర పోలీసు కమిషనరేట్‌ పరిధిలో ఉన్న శునకాలు ఆయా విభాగాలకు అనుగుణంగా పనిచేస్తున్నాయా? లేదా అనేది తెలుసుకున్నారు. ఇంటిలిజెన్స్‌ ఐజీ శశిధర్‌, ఆర్‌.ఐ. శ్రీనివాస్‌, పశువైద్యులు డాక్టర్‌ ప్రతాప్‌, సి.ఐ. రామచంద్రారెడ్డి, ఆర్‌.ఐ. రమేష్‌, ఎ.ఆర్‌.ఐ. చంద్రశేఖర్‌ పాల్గొన్నారు.