విశాఖపట్నం జిల్లా పెదబయలు మండలం సిరసపల్లిలో పశువులను మేపడానికి రోహిత్ కుమార్ అనే బాలుడు తన స్నేహితులతో కలిసి అడవికి వెళ్ళాడు. సాయంత్రం అతను తప్ప మిగతా పిల్లలు మాత్రమే గ్రామానికి చేరుకున్నారు. బాలుడి తల్లిదండ్రులు రోహిత్ గురించి వారిని ప్రశ్నించగా.. చరవాణి ఎక్కడో పడిపోయిందని, దానిని వెతకడానికి వెళ్లాడని చెప్పారు. అదృశ్యమైన బాలుడి కోసం గాలిస్తున్న గ్రామస్థులకు స్థానికంగా ఉన్న కొండపై చెట్టుకు వేలాడుతూ రోహిత్ కుమార్ మృతదేహం కనిపించింది. విగతజీవిగా పడి ఉన్న రోహిత్ను చూసి తల్లిదండ్రులు బోరున విలపించారు.
చరవాణి పోగొట్టుకున్నందున ఇంట్లో వాళ్లు మందలిస్తారన్న భయంతో ఆత్మహత్యకు పాల్పడి ఉంటాడని స్థానికులు అనుమానం వ్యక్తం చేస్తున్నారు. తన కుమారుడిని ఎవరో కావాలనే హత్య చేసి, ఉరి వేసి ఆత్మహత్యగా చిత్రీకరిస్తున్నారని మృతుని తండ్రి కృష్ణారావు ఆవేదన వ్యక్తం చేశారు. పోలీసులు కేసు నమోదు చేసి దర్యాప్తు చేస్తున్నారు.