అంధ్రా కశ్మీర్ చూడాలంటే...చలో లంబసింగి

ఆంధ్రా కశ్మీర్ లంబసింగిలో మంచు ముత్యాలు కురుస్తుంటాయి.. కొమ్మకొమ్మకూ పూలన్నట్లు...ఎటుచూసినా మంచు బిందువులే రాలుతూంటాయి... అక్కడ పిల్లగాలులతో సయ్యాటలాడుతూ తెల్లటి మబ్బులు నేలను తాకుతూ జారిపోతూంటాయి.... తెల్లటి చామంతుల్లా మెరిసి.. విరిసిన కాఫీ పూల పరిమళాలు పలకరిస్తూంటాయి... ఎతైన కనుమల మధ్య, చుట్టూ పరుచుకున్న లోయల మధ్య ఒంటరిగా ఉండే ఆ సీమలో అడుగుపెడితే.. లేలేత ఎరుపుతో నవనవలాడే యాపిల్ కాయలతో ఇప్పుడిప్పుడే ఎదుగుతున్న తోటలు కన్పిస్తాయి. స్వర్గానికి నిచ్చెనలు ఇక్కడినుంచే వేయొచ్చన్న భావన మనసును తాకుతుంది. ఇదంతా చూస్తే మీకు అందాల కశ్మీరం కళ్లముందు కదలాడుతుంది. కానీ ఇది కశ్మీర్ కాదు... అక్కడున్న అందాలతో మైమరిపిస్తున్న లంబసింగి సొబగులు ఇవి.

ఆంధ్రా కశ్మీర్ లంబసింగిలో చలి స్థానికులను వణికిస్తుంది. వారం రోజులుగా వాతావణంలో కొంత మార్పు వచ్చింది. కనిష్ట ఉష్ణోగ్రతలు పెరిగాయి. సోమవారం ఒక్కసారిగా చలి తీవ్రత పెరిగింది. చింతపల్లిలో సోమవారం 8.3 డిగ్రీల కనిష్ట ఉష్ణోగ్రత నమోదైనట్టు ప్రాంతీయ వ్యవసాయ పరిశోధన వాతావరణ విభాగం శాస్త్రవేత్త సౌజన్య తెలిపారు. సహజంగానే చింతపల్లి కంటే లంబసింగిలో ఉష్ణోగ్రతలు రెండు డిగ్రీలు తక్కువగా నమోదు అవుతోంది.

ప్రస్తుతం లంబసింగిలో 6 డిగ్రీల ఉష్ణోగ్రత ఉంటుంది. కనిష్ట ఉష్ణోగ్రతలు భారీగా తగ్గడం కారణంగా చలి తీవ్రత పెరిగిపోయింది. అలాగే మంచు కూడా దట్టంగా కురుస్తోంది. తాజా వాతావరణ పరిస్థితులు స్థానిక ప్రజలకు ఇబ్బంది కలిగిస్తోంది. ఇదిలావుంటే ఈ ప్రాంతాల సందర్శనకు అనుకూలమైన సమయం కావడంతో పర్యటకులు భారీగా తరలివస్తున్నారు. లంబసింగికి మూడు కిలోమీటర్లు దూరంలో నున్న చెరువుల వెనంలోనూ వాతావరణం మైమరిపిస్తుంది. ఇక్కడ మంచు అందాలు ఆకట్టుకుంటున్నాయి.

తాజంగి జలాశయం వద్ద కూడా పర్యటకులు బారులు తీరుతున్నారు. ఈ ఏడాది చివరి రోజు డిశెంబరు 31 రాత్రి ఎక్కడ జరుపుకోవాలని ఆలోచించే వారికి ప్రస్తుతం మారిన వాతావరణం వల్ల లంబసింగిలో అనుకూల వాతావణం అందుబాటులో ఉంది. ఇక ఆలస్యం ఎందుకు లంబసింగి సందర్శనకు అనువైన ప్రణాళికను రూపొందించి బయల్దేరడమే ఆలస్యం.

ఇవీ చదవండి...ఈ ప్రకృతి అందాలు చూడతరమా...