వారం వ్యవధిలో ఇద్దరు చిన్నారులు.. ఆరు నెలల కాలంలో 8 మంది పసివాళ్లు, రెండేళ్లలో 14 మంది శిశువులు.. విశాఖ మన్యంలోని పాత రూఢకోటలో ప్రాణాలు కోల్పోయిన చిన్నారుల సంఖ్య ఇది. గిరిజనులుండే ఈ పల్లెలో చోటు చేసుకుంటున్న శిశుమరణాలు.. స్థానికుల్ని తీవ్ర భయాందోళనలకు గురిచేస్తున్నాయి. పసిపిల్లలు కళ్లెదుటే గిలగిలా కొట్టుకుని చచ్చిపోతున్నారని.. తమ గ్రామానికి ఏదో జరిగిందని అమాయకపు ఆదివాసులు వణికిపోతున్నారు.
మన్యంలో శిశుమరణాలు.. ఊరొదిలి వెళ్తున్న తల్లిదండ్రులు..!
నవ మాసాలు కడుపున మోసి కన్న పిల్లల ఎదుగుదల చూద్దామనే ఆశ తీరక ఆ గ్రామ మహిళలు.. మానసికంగా కుంగిపోతున్నారు. చిన్నారులను బలి తీసుకుంటున్న గ్రామంలో ఎందుకు ఉన్నామంటూ ఆవేదన చెందుతున్నారు. అంతు చిక్కని శిశుమరణాలతో భయం గుప్పిట్లో బతుకుతున్నారు. కొంతమంది ఇళ్లకు తాళాలు వేసి గ్రామం విడిచి వెళ్తున్నారు.