రాష్ట్ర డీజీపీ గౌతమ్‌ సవాంగ్‌కూ సైబర్ నేరగాళ్ల బాధ తప్పలేదు. ఎవరో గుర్తు తెలియని వ్యక్తులు ‘డీజీపీ ఆంధ్రప్రదేశ్’ పేరిట ట్విటర్‌లో ఆదివారం ఓ నకిలీ ఖాతాను ప్రారంభించారు. డీజీపీ గౌతమ్‌ సవాంగ్‌ చిత్రాన్ని ఆ ఖాతాకు డీపీగా పెట్టారు. ఆంధ్రప్రదేశ్ డీజీపీ అధికారిక ఖాతా ఇది అని ట్విటర్‌ హ్యాండిల్‌లో పేర్కొన్నారు. వరుసగా పలు ట్వీట్లు చేశారు. నకిలీ ఖాతా అనే విషయం గుర్తించకముందు పలు జిల్లాల ఎస్పీలు, ఇతరులు ఈ ట్విటర్‌ ఖాతాను అనుసరించారు.
అయితే.. అందులో వరుసగా చేసిన ట్వీట్లు అనుమానాస్పదంగా ఉండటంతో అది నకిలీ ఖాతాగా గుర్తించగలిగారు. విషయం తెలిసిన వెంటనే పోలీసు ప్రధాన కార్యాలయం ట్విటర్‌కు ఫిర్యాదు చేసి ఈ ఖాతాను స్తంభింపజేసింది. ఈ అంశంపై విజయవాడలోని సైబర్ నేరాల పోలీసుస్టేషన్‌లో ఫిర్యాదు చేసింది. ఏ ఐపీ చిరునామా నుంచి ఈ నకిలీ ఖాతాను ప్రారంభించారు? దీని వెనక ఎవరున్నారు? అనే అంశాలపై సైబర్ పోలీసులు దర్యాప్తు ప్రారంభించారు.