Tirupati Smart City : తిరుపతి నగరం మొత్తం ఎక్కడ పడితే అక్కడ తవ్వి వదిలేసిన గుంతలు, రోడ్డుపై అడ్డుగా పెట్టిన బారీకేడ్లు దర్శనమిస్తున్నాయి. భూమిలోంచి పైకి వచ్చిన తీగలు కారణంగా పాదచారులతో పాటు వాహనదారులు తీవ్ర ఇక్కట్లుకు గురవుతున్నారు. భూగర్భ విద్యుత్ కేబుల్ వ్యవస్థ నిర్మాణం పేరుతో నగరంలోని ప్రధాన రహదారులు తవ్వి వదిలేయడంతో ఈ పరిస్థితి నెలకొంది. నిర్మాణాలు ముందుకు సాగక తవ్విన గుంతలూ సరిగా పూడ్చక ప్రజలు తీవ్ర ఇబ్బందులు ఎదుర్కొంటున్నారు.
టీడీపీ ప్రభుత్వంలో పచ్చజెండా :పనులు మొదలై మూడేళ్లు దాటినా భూగర్భ విద్యుత్ పనులు ఎక్కడవేసిన గొంగళి అక్కడే అన్న విధంగా మారిపోయాయి. తిరుపతి నగరాన్ని వ్రేలాడే విద్యుత్ తీగల రహిత నగరంగా తీర్చిదిద్దే లక్ష్యంతో గత ప్రభుత్వ హయాంలోనే ఈ ప్రాజెక్ట్‌కు పచ్చజెండా ఊపారు. 2019లో భూగర్భ విద్యుత్ ప్రాజెక్టు పనులను ప్రారంభించింది. ప్రభుత్వం మారడం.. వైఎస్సార్సీపీ అధికారంలోకి రావడంతో ఈ పనులూ అటకెక్కాయి.
సకాలంలో నిధులు ఇవ్వని ప్రభుత్వం : పనుల జాప్యానికి నగరపాలక అధికారులు రకరకాల కారణాలు చెబుతున్నా గుత్తేదారులకు సకాలంలో నిధులివ్వకపోవడంతోనే పనులు జరగడం లేదన్న విమర్శలు ఉన్నాయి. రోడ్లు, భవనాలు, అటవీ శాఖ అనుమతుల్లో జాప్యంతో పాటు కరోనాతో రెండేళ్లు జాప్యం జరిగిందని అధికారులు ప్రకటించారు. కరోనా తగ్గి రెండు సంవత్సరాలు గడుస్తున్నా అన్ని అనుమతులు వచ్చినా పనులు మాత్రం ముందుకు సాగడం లేదు.
ట్రాఫిక్‌ సమస్యలు : భూగర్బ విద్యుత్ తీగల నిర్మాణం పేరుతో రహదారులు తవ్వేయడంతో నగర వాసులు తీవ్ర ఇబ్బందులు ఎదుర్కొంటున్నారు. రహదారులు తవ్వి వదిలేయడంతో ట్రాఫిక్‌ సమస్యలతో పాటు వ్యాపారాలకు ఇబ్బందులు ఎదురవుతున్నాయని నగర వాసులు వాపోతున్నారు.