Lokesh fire on cm jagan : చంద్రబాబు పరిపాలనలో సన్ రైజ్ ఆంధ్రప్రదేశ్ గా ఉన్న రాష్ట్రం... నేడు జగన్ పాలనలో ఫినిష్ ఆంధ్రప్రదేశ్ గా మారిందని టీడీపీ జాతీయ ప్రధాన కార్యదర్శి నారా లోకేశ్ ఆరోపించారు. యువగళం పాదయాత్రలో భాగంగా మదనపల్లిలోని టీకేెఎన్ వెంచర్ అన్నమయ్య నగర్ లో జరిగిన బహిరంగసభలో లోకేశ్ పాల్గొన్నారు. మదనపల్లి వైఎస్సార్సీపీ ఎమ్మెల్యే నవాజ్ బాషా సోదరుడు, మాజీ ఎమ్మెల్యే షాజహాన్ బాషా టీడీపీలో చేరారు. బహిరంగ సభలో లోకేశ్ పసుపు కండువా కప్పి పార్టీలోకి ఆహ్వానించారు. మదనపల్లిని టీడీపీ కంచుకోటగా చేసేందుకు షాజహాన్ కృషిచేయాలని కోరారు. పోరాటాలకు పుట్టినిల్లు మదనపల్లె అని... స్వాతంత్ర ఉద్యమ పోరాటం కోసం ఉమ్మడి చిత్తూరు జిల్లాలో అత్యధిక విరాళాలు ఇచ్చింది మదనపల్లి నుంచేనని ఆయన తెలిపారు. జాతీయగీతం బెంగాళీ భాష నుంచి తెలుగులో అనువాదం జరిగిన పవిత్ర భూమి మదనపల్లె అన్నారు.
అప్పుల్లో నంబర్ 1... జగన్ పాలనలో రాష్ట్రం అప్పుల్లో, అధికధరల్లో, పన్నుల్లో నెంబర్‍ 1 గా ఉందని ఎద్దేవా చేశారు. జగన్ అమలు చేసే ప్రతి పథకం వెనకాల ఓ కుంభకోణం దాగి ఉందని ఆరోపించారు. కళాశాల విద్యార్థులకు ఫీజు రీఎంబర్స్‌మెంట్ ఎత్తివేసి, తల్లిదండ్రులను అప్పులపాలు చేస్తున్నారని మండిపడ్డారు. సంపూర్ణ మద్యపాన నిషేధమన్న జగన్, స్వయంగా మద్యం తయారు చేస్తున్నాడని ఆరోపించారు. మహిళల తాళిబొట్లును సైతం తాకట్టు పెట్టేలా, కుటుంబాలను అప్పుల మయంగా చేశారని, దుయ్యబట్టారు. పేదలకు ఇళ్లపట్టాల పథకం కింద వైఎస్సార్సీపీ నాయకులు 25వేల కోట్లు దోచేశారని ఆరోపించారు. జగన్ మైనారిటీలను నమ్మించి మోసం చేశాడని... మైనారిటీలను అన్నివిధాలా ఆదుకుంది, రాజకీయంగా ప్రోత్సాహించింది టీడీపీ మాత్రమే అని గుర్తు చేశారు.