Vamsadhara-Nagavali linking project Works Pending : ఏడాదిలో వంశధార - నాగావళి అనుసంధానం పూర్తి చేస్తామని ఆర్భాటంగా ప్రకటించి.. ప్రాధాన్యత ప్రాజెక్టుల జాబితాలోనూ చేర్చారు. ఇంకేముంది ఏడాది తర్వాత కాలువల్లో నీరు పారుతుందని సిక్కోలు రైతులు ఆనందపడ్డారు. కానీ, ఆ తర్వాత గడువు పెంచుతూ పోయారు. చివరకి ఇప్పటి వరకు అనుసంధానం పూర్తి చేస్తామని ప్రకటించి నాలుగేళ్లు గడిచింది. గత తెలుగుదేశం ప్రభుత్వం 60 శాతం పనులు చేస్తే.. వైఎస్సార్సీపీ సర్కార్‌ కేవలం 20 శాతం మాత్రమే చేసింది. వాటికీ బిల్లులు చెల్లించలేదు. ఫలితంగా గుత్తేదారులు పనులు ఆపేశారు. ఇప్పటికే తవ్విన కాలువల్లో పిచ్చిమొక్కలు, కంప చెట్లు పెరిగిపోయి.. ఇంతవరకు చేసిన పనులు ధ్వంసమవుతున్నాయి.
వంశధార వరద జలాలను నాగావళి నదికి మళ్లించి సిక్కోలును అన్నపూర్ణగా మార్చాలన్న ఉద్దేశంతో.. గత తెలుగుదేశం ప్రభుత్వం వంశధార-నాగావళి అనుసంధాన ప్రాజెక్టును తలపెట్టింది. 2017 మార్చి 27న 84.90 కోట్ల రూపాయలతో పరిపాలనామోదం ఇచ్చింది. హిరమండలం జలాశయం నుంచి హైలెవెల్‌ కాలువ తవ్వి దాని ద్వారా నాగావళి నదిపై ఉన్న నారాయణపురం ఆనకట్టకు కలపాలన్నది ప్రాజెక్టు ఉద్దేశం. శ్రీకాకుళం జిల్లాలో 37వేల 53 ఎకరాల ఆయకట్టు స్థిరీకరణ, మరో 5 వేల ఎకరాల కొత్త ఆయకట్టుకు నీరు అందించాలని లక్ష్యంగా పెట్టుకున్నారు. మొదట 130 క్యూసెక్కులను హైలెవెల్‌ కాలువ మీదుగా తీసుకెళ్లాలని ప్రతిపాదించగా.. ఆ తర్వాత 600 క్యూసెక్కుల నీటిని తరలించాలని సామర్థ్యాన్ని పెంచారు. తెలుగుదేశం హయాంలోనే భూమి సేకరణ పనులు పూర్తయి.. 2019 మే నెల నాటికే 60 శాతం పనులను పూర్తి చేశారు.
పనులు చకచకా జరుగుతున్న సమయంలోనే ప్రభుత్వం మారింది. వైఎస్సార్సీపీ అధికారంలోకి వచ్చిన తర్వాత ప్రవాహ సామర్థ్యాన్ని పెంచుతూ.. అంచనా వ్యయాన్ని 145.34 కోట్ల రూపాయలకు పెంచేశారు. అయినా ఇప్పటివరకు హిరమండలం జలాశయం నుంచి నారాయణపురం ఆనకట్ట వరకు 33.583 కిలోమీటర్ల మేర కాలువ తవ్వకం పనులు పూర్తి చేయలేదు. మొత్తం 64 కట్టడాలకుగాను 34 మాత్రమే పూర్తయ్యాయి. మరో 32 వేల క్యూబిక్‌ మీటర్ల మేర కాంక్రీట్‌ పనులు, 1.66 లక్షల క్యూబిక్‌ మీటర్ల మట్టి పనులు చేయాల్సి ఉంది. మరో 1.7 కిలోమీటర్ల మేర కాలువ తవ్వాల్సి ఉంది. హెడ్‌ రెగ్యులేటర్లు, క్రాస్‌ రెగ్యులేటర్ల పనులు, గేట్లు, 10 డిస్ట్రిబ్యూటర్ల నిర్మాణాల పనులు ఇంకా చేపట్టాల్సి ఉంది. నిధులు సరిగా ఇవ్వక, పూర్తయిన పనులకు బిల్లులు చెల్లించక పనులు ముందుకు సాగడం లేదు. ఈ ప్రాజెక్టుకు హిరమండలం జలాశయమే ఆధారం. ఇందులో ఇంకా పూర్తిస్థాయిలో నీటిని నిల్వ ఉంచడం లేదు. ఆ జలాశయం నిర్మాణాన్నీ, అనుసంధాన పనులనూ పూర్తిచేయాల్సి ఉంది.
జగన్ ముఖ్యమంత్రిగా అధికారం చేపట్టాక మొదటి ఏడాదిలో ఎన్ని ప్రాజెక్టుల నిర్మాణం పూర్తి చేయొచ్చో జలవనరులశాఖ ఓ జాబితా సిద్ధం చేసింది. ప్రాజెక్టు నిర్మాణానికయ్యే వ్యయం స్వల్పంగా, పూర్తిచేస్తే కలిగే ప్రయోజనాలు అధికంగా ఉన్న వాటినే అందులో ప్రస్తావించింది. 2020-21లో వెయ్యి 78 కోట్ల రూపాయలతో అయిదింటిని పూర్తి చేయొచ్చని పేర్కొంది. తొలి ప్రాధాన్యం పొందినవాటిల్లో వంశధార - నాగావళి అనుసంధానం ఒకటి.