పురాతన వస్తువు అంటూ అమ్మబోయారు... చివరకు!

తమ దగ్గర ఉన్న పురాతన వస్తువు ఇంట్లో పెట్టుకుంటే అంతా కలసి వచ్చి ధనవంతులు అవుతారని ఆశ చూపారు. అమాయకులతో బేరం కుదుర్చుకుని మోసం చేయాలనుకున్నారు. ఈ క్రమంలో.. ఒడిశా, ఆంధ్రా ప్రాంతానికి చెందిన ఆరుగురి సభ్యుల ముఠా సభ్యులంతా టెక్కలి పోలీసులకు చిక్కారు.

మైసూర్ మహారాజు ఈస్ట్ ఇండియా కంపెనీతో 1818లో కుదుర్చుకున్న పురాతన ఒప్పంద పత్రం తమ వద్ద ఉందని అమ్మబోయిన ఆరుగురు సభ్యుల ముఠాను టెక్కలి పోలీసులు సోమవారం అరెస్ట్ చేసి రిమాండ్​కు తరలించారు. నిందితుల్లో ఆంధ్రా-ఒడిశా రాష్ట్రాలకు చెందిన వ్యక్తులు ఉన్నారు.

పోలీసుల కథనం మేరకు..

శ్రీకాకుళం జిల్లా కోటబొమ్మాళి మండలం నీలంపేట గ్రామానికి చెందిన యజ్ఞల చిరంజీవి పెయింటింగ్ పనులు నిర్వహిస్తుంటాడు. ఇతడికి మూడు నెలల కిందట ఒడిశాలోని కాశీనగర్ ప్రాంతానికి చెందిన కరణం సంపతిరావు పరిచయం అయ్యాడు. ఆయన వద్ద పురాతన తామ్రపత్రం ఉందని, దాన్ని ఇంట్లో పెట్టుకుంటే ధనలాభం కలుగుతుందని చెప్పడంతో వీరు మరో నలుగురితో కలసి అమ్మేందుకు ప్రయత్నించారు.

విశాఖపట్నంలో ఉన్న ఓ వ్యక్తికి రూ.3 లక్షలకు అమ్మేందుకు ఒప్పందం కుదిరింది. ముందుగా రూ.10వేలు వసూలు చేసిన వీరు... మిగిలిన మొత్తం వసూలు చేసేందుకు ప్రయత్నాలు చేస్తున్న సమయంలో పోలీసులకు చిక్కారు. టెక్కలి ఆర్టీసీ కాంప్లెక్స్ సమీపంలో నిందితులను పోలీసులు మాటువేసి పట్టుకున్నారు. ఈ పత్రం అసలుదా, నకిలీదా తేలాల్సి ఉందని.. ఇటువంటి వారి మాయలో పడి మోసపోవద్దని టెక్కలి ఎస్సై కామేశ్వరరావు తెలిపారు. నిందితులను అరెస్టు చేసి రిమాండ్​కి తరలించామన్నారు.

ఇదీ చదవండి: