శ్రీకాకుళంలో లారీ ఢీకొని వ్యక్తి మృతి
శ్రీకాకుళం జిల్లా నరసన్నపేట మండలం గుండువిల్లిపేట సమీపంలో లారీ ఢీకొని ఓ వ్యక్తి అక్కడికక్కడే ప్రాణాలు కోల్పోయాడు. రేవు అంపలాం గ్రామానికి చెందిన గిన్ని రాజేశ్వరరావు.. తన భార్య రజనీతో కలిసి ద్విచక్ర వాహనంపై శ్రీకాకుళం బయలుదేరారు. ఇదే సమయంలో వెనుక నుంచి వస్తున్న లారీ వీరి వాహనాన్ని ఢీ కొట్టింది. ఈ ఘటనలో రాజేశ్వరరావు అక్కడికక్కడే ప్రాణాలు కోల్పోయాడు. వీరికి పెళ్లై పట్టుమని ఏడాది కూడా కాలేదు. తన కళ్లెదుటే భర్త చనిపోవడం చూసిన భార్య రజని కన్నీరు మున్నీరుగా విలపించారు. ప్రమాదంపై నరసన్నపేట పోలీసులు కేసు నమోదు చేసి దర్యాప్తు చేస్తున్నారు.