ఒకప్పుడు దుర్గంధ ప్రాంతం... నేడు సర్వాంగ సుందరం

ఒకప్పుడు చేపల బజారు... నేడు సర్వాంగ సుందరంగా ముస్తాబైన ఆర్టీసీ బస్టాండ్‌. గ్రామం మధ్యలో కంపుతో అటు వెళ్లాలంటే భయపడే జనం నేడు అక్కడ ప్రశాంతంగా ఊపిరి పీల్చుకుంటున్నారు. పాలకుల నిర్ణయాలు... అధికారుల కార్యదక్షతతో ఈ ప్రాంతం నలుగురికి నీడనిస్తోంది.

శ్రీకాకుళం జిల్లా కోటబొమ్మాళిలో ప్రధాన రహదారిపైనే చేపల బజారు ఉండేది. అపరిశుభ్ర వాతావరణంతో నిత్యం అక్కడ ఇబ్బందికర పరిస్థితులే ఉండేవి. ప్రజలు నానాపాట్లు పడుతుండేవారు. అపరిశుభ్ర వాతావరణంలో ఉండే ఈ ప్రాంతం పాలకుల చొరవతో సుందరంగా మారింది. వ్యాపారులకు ఇబ్బందిలేకుండా చేపల మార్కెట్‌ను రైతు బజారు పక్కకు మార్చేశారు. 25 లక్షల నిధులు ఖర్చు చేసి అధునిక సదుపాయాలతో కొత్త బజారును తీర్చిదిద్దారు. 3 లక్షల రూపాయలతో పాత చేపల బజారుకు కొత్త రూపు ఇచ్చారు. మంచాలపేట రహదారి మీదుగా కోటబొమ్మాళి వైపు ప్రయాణించే బస్సులు నిలిపే ఆర్టీసీ సముదాయాన్ని నిర్మించారు. పాలకులు, అధికారులు తలంపుతో పని చేస్తే ప్రజా సమస్యలు పరిష్కారమవుతాయి అనడానికి ఈ రెండే నిలువెత్తు సాక్ష్యంగా నిలుస్తున్నాయని స్థానికులు ప్రశంసిస్తున్నారు.