శ్రీకాకుళం జిల్లాలో ఘనంగా ఎన్టీఆర్ వర్ధంతి..

మాజీ ముఖ్యమంత్రి, తెదేపా వ్యవస్థాపకుడు ఎన్టీఆర్ 25వ వర్ధంతి సందర్భంగా శ్రీకాకుళం జిల్లాలో తెదేపా నేతలు ఆయనకు ఘనంగా నివాళులర్పించారు. మహానేత హయాంలో పేదలకోసం చేపట్టిన సంక్షేమ కార్యక్రమాలను గుర్తుచేసుకున్నారు. జిల్లా వ్యాప్తంగా అనేక చోట్ల పెద్దఎత్తున కార్యకర్తలు, అభిమానులు రక్తదాన కార్యక్రమాల్లో పాల్గొన్నారు.

• శ్రీకాకుళంలో..

నందమూరి తారక రామారావు వర్ధంతి సందర్భంగా.. శ్రీకాకుళం తెదేపా కార్యాలయం, ఏడు రోడ్ల కూడలిలోని ఆయన విగ్రహాలకు మాజీ ఎమ్మెల్యే గుండ లక్ష్మీదేవి పూలమాలలు వేసి నివాళులర్పించారు. ఎన్టీఆర్ ముఖ్యమంత్రిగా బాధ్యతలు చేపట్టి.. పేదలకు కిలో బియ్యం రెండు రూపాయలు, జనతా వస్త్రాలు, పేదలకు పక్కా ఇళ్లు అందించారని కొనియాడారు. ఎన్టీఆర్ కు భారతరత్న ఇచ్చి గౌరవించాలని డిమాండ్ చేశారు.

• టెక్కిలిలో..

శ్రీకాకుళం జిల్లాలో మాజీ ముఖ్యమంత్రి, తెదేపా వ్యవస్థాపకుడు ఎన్టీఆర్ వర్థంతిని నిర్వహించారు. టెక్కలి నియోజకవర్గంలో ఆయన వర్దంతిని ఘనంగా నిర్వహించారు. ఎన్టీఆర్ పార్కులో ఆయన విగ్రహానికి, పాతజాతీయ రహదారిపై కృష్ణుడు రూపంలో ఉన్న ఎన్టీఆర్ విగ్రహాలకు నేతలు పూల మాలలు వేసి నివాళులర్పించారు. ఈ కార్యక్రమంలో మాజీ ఎంపీపీ మట్ట సుందరమ్మ, హనుమంతు రామకృష్ణ పాల్గొన్నారు.

టెక్కలిలోని తెదేపా కార్యాలయంలో రక్తదాన శిబిరాన్ని నిర్వహించారు. నియోజకవర్గంలోని నాలుగు మండలాల నుంచి అభిమానులు, కార్యకర్తలు హాజరై రక్తదానం చేశారు. పలువురు మహిళలు సైతం ఉత్సాహంగా పాల్గొని రక్తదానం చేశారు.

• నరసన్నపేటలో..

మాజీ ఎమ్మెల్యే బగ్గు రమణమూర్తి ఆధ్వర్యంలో నరసన్నపేటలో ఎన్టీఆర్ విగ్రహానికి పూలమాలలు వేసి నివాళులు అర్పించారు. ఎన్టీఆర్ ప్రపంచ ఖ్యాతి పొందిన ప్రజా నాయకుడని రమణమూర్తి అభివర్ణించారు. ఈ సందర్భంగా ప్రస్తుత ప్రభుత్వ తీరును ఎండగట్టారు. రాష్ట్రంలో రాక్షస పాలన సాగుతోందని మండిపడ్డారు. ఈ కార్యక్రమంలో అధిక సంఖ్యలో కార్యకర్తలు నాయకులు పాల్గొని నివాళులర్పించారు.

• కోటబొమ్మాళిలో..

కోటబొమ్మాళిలోని ఎన్టీఆర్ - ఎర్రన్న పార్క్ వద్ద ఉన్న ఎన్టీఆర్ విగ్రహానికి కోటబొమ్మలి పీఏసీఎస్​ మాజీ అధ్యక్షుడు కింజరాపు హరివరప్రసాద్, పార్టీ రాష్ట్ర కార్యదర్శి బోయిన గోవిందరాజులు పూలమాలలు వేసి నివాళులు అర్పించారు.

• ఆమదాలవలసలో..

శ్రీకాకుళం జిల్లా ఆమదాలవలస పారిశ్రామిక వాడ వద్ద ఎన్టీఆర్ వర్ధంతిని తెదేపా జిల్లా పార్లమెంటరీ నియోజకవర్గ అధ్యక్షులు కూన రవికుమార్ ఆధ్వర్యంలో కార్యకర్తలు నిర్వహించారు. ఎన్టీఆర్ విగ్రహానికి పూలమాల వేసి నివాళులర్పించి.. పలు సేవా కార్యక్రమాలు చేపట్టారు.

• ఇచ్చాపురంలో..

ఉమ్మడి రాష్ట్ర మాజీ ముఖ్యమంత్రి, తెదేపా వ్యవస్థాపకులు నందమూరి తారక రామారావు వర్ధంతిని ఇచ్ఛాపురం ఎమ్మెల్యే డాక్టర్ అశోక్ ఆధ్వర్యంలో తెదేపా నేతలు, ఎన్టీఆర్ అభిమానులు నివాళులు అర్పించారు. పట్టణంలో ఎన్టీఆర్ విగ్రహానికి ఎమ్మెల్యే పూలమాలలు వేసి ఘనంగా నివాళులు అర్పించారు. ఎన్టీఆర్ అమర్ రహే అంటూ నినాదాలు చేశారు.

ప్రజలకు కూడు, గుడ్డ అందించాలనే సంకల్పంతో సంక్షేమ పథకాలకు శ్రీకారం చుట్టిన ఘనత ఎన్టీ రామారావుకే దక్కుతుందని.. తెలుగుజాతి ఆత్మగౌరవానికి ప్రతీకగా నిలిచి ప్రపంచానికి చూపించిన మహనీయుడు ఎన్టీఆర్ అని కొనియాడారు. పేదల కోసం, ప్రజల సంక్షేమం కోసం ఎన్టీఆర్ స్థాపించిన తెలుగుదేశం పార్టీ ఆశయాలను సాధించడానికి కార్యకర్త కట్టుబడి ఉన్నారన్నారు.

• రాజాంలో..

తెదేపా వ్యవస్థాపకుడు ఎన్టీ రామారావు చేసిన సేవలు మరువలేనివని.. తెలుగు జాతి గర్వించదగ్గ వ్యక్తి ఎన్టీఆర్ అని మాజీ మంత్రి, రాజాం నియోజకవర్గం తెదేపా ఇంచార్జ్ కొండ్రు మురళీ మోహన్ అన్నారు. రాజంలోని తెదేపా క్యాంపు కార్యాలయంలో ఎన్టీఆర్ 25వ వర్ధంతిని రాజాం, రేగిడి, వంగర, సంతకవిటి మండలం నాయకులు పాల్గొని ఎన్టీఆర్​కు పూలమాలలు వేసి నివాళులు అర్పించారు.

బడుగు బలహీన వర్గాల సంక్షేమం కోసం ఎన్టీఆర్ ఎంతో కృషి చేశారని ఆయన కొనియాడారు. తెలుగువారి గుండెల్లో సుస్థిర స్థానం సంపాదించిన వ్యక్తి ఎన్టీఆర్ అని అన్నారు. ఆయన అడుగు జాడల్లో తెదేపా నాయకులు, కార్యకర్తలు నడుచుకొని పార్టీ బలోపేతానికి కృషి చేయాలని సూచించారు. రానున్న అన్ని ఎన్నికల్లోనూ తెలుగుదేశం పార్టీ గెలుపు ఖాయమని ఆశాభావం వ్యక్తం చేశారు.

ఇవీ చూడండి...:అగ్నికి ఆహుతైన 14 పూరిళ్లు