శ్రీకాకుళం జిల్లా నుంచి చెన్నై ప్రాంతానికి ఉపాధి కోసం పెద్దసంఖ్యలో మత్స్యకారులు వెళ్తుంటారు.ఈనెల 7న కొందరు ఓ బోటులో వేటకు వెళ్లారు. సాధారణంగా మూడు వారాల పాటు సముద్రంలోనే వేట సాగించి మత్స్యసంపదను తీసుకొస్తుంటారు. తీరం నుంచి సంబంధిత యజమాని వీరితో చరవాణి, వైర్‌లెస్‌ సెట్ల ద్వారా నిరంతరం మాట్లాడుతుంటాడు. 16వ తేదిన పడవలో ఉన్న మత్స్యకారులు యజమానితో మాట్లాడుతూ పడవలోకి నీరు చేరుతుందని ఇబ్బందుల్లో ఉన్నామని.. చెబుతుండగానే సంబంధాలు తెగిపోయాయి. చరవాణులు సైతం పనిచేయలేదు. దీంతో ఏం జరిగిందో తెలియని పరిస్థితి ఏర్పడింది.
నాలుగు రోజులు దాటినా బోటుతో పాటు మత్స్యకారుల సమాచారం తెలియకపోవడంతో చెన్నైలోని వలస మత్స్యకారుల సంక్షేమ సంఘ నాయకులు సోమవారం తమిళనాడు మత్స్యశాఖాధికారులకు ఫిర్యాదు చేశారు. ఎక్కువమంది సిక్కోలు వాసులే కావడంతో ఎంపీ రామ్మోహన్‌నాయుడు, రాష్ట్ర మంత్రి సీదిరి అప్పలరాజు సైతం ఈ ఘటనపై స్పందించారు. తమిళనాడు, కేంద్ర మత్స్యశాఖ అధికారులతో మాట్లాడారు.
నావికాదళం గాలింపు చర్యలు చేపట్టడంతో సముద్రం మధ్యలో బోటు ఆచూకీ కనిపించింది. అంతా సురక్షితంగా ఉన్నారని తెలిసింది. బోటులో సాంకేతిక సమస్య వల్లనే ఈ పరిస్థితి వచ్చినట్లు తెలిపారు. మత్స్యకారులను రక్షించేందుకు చర్యలు తీసుకోవాలని కోరుతూ ఎంపీ రామ్మోహన్‌నాయుడు దిల్లీలోని కేంద్ర హోంశాఖ సహాయమంత్రి నిత్యానందరాయ్‌ను కలసి వినతిపత్రం అందించారు.