మాస్క్ వివాదం: చీరాల ఎస్సై దాడిలో యువకుడు మృతి

మాస్కు వివాదం ఓ యువకుడు మృతికి కారణమైంది. చీరాల ఎస్సై విచక్షణారహితంగా కొట్టటంతో తమ కుమారుడు మృతి చెందాడని అతని తండ్రి ఆరోపించాడు. బాధ్యుడిపై కఠిన చర్యలు తీసుకోవాలని డిమాండ్ చేశాడు.

ఎస్సై విచక్షణారహితంగా కొట్టటంతో యువకుడు ప్రాణాలు కోల్పోయిన ఘటన ప్రకాశం జిల్లా చీరాలలో జరిగింది. మాస్క్ ధరించకుండా బయటకు వచ్చాడన్న కారణంగానే తమ కుమారుడ్ని ఎస్సై కొట్టాడని మృతుడి తండ్రి ఆరోపించాడు. ఆ ఎస్సైపై కఠిన చర్యులు తీసుకోవాలని భాదిత కుటుంబ సభ్యులు డిమాండ్ చేశారు.

అసలేం జరిగింది

చీరాలకు చెందిన వై.కిరణ్ కుమార్... మరో యువకుడితో కలిసి ద్విచక్రవాహనంపై కొత్తపేటకు వెళ్లి తిరిగి ఇంటికి బయలుదేరారు. కొత్తపేట పంచాయతీ కార్యాలయం వద్ద ఏర్పాటు చేసిన చెక్ పోస్టు వద్ద పోలీసు సిబ్బంది వీరిని ఆపి మాస్క్ ఎందుకు పెట్టుకోలేదని ప్రశ్నించారు. ఈ క్రమంలోనే ఎస్సై విజయకుమార్... కిరణ్​ మధ్య వాగ్వాదం జరిగింది. కోపంతో ఎస్సై దాడి చేయగా... కిరణ్ తలకి బలమైన గాయం అయ్యింది అని బాధిత కుటుంబసభ్యులు చెప్పారు.

క్షతగాత్రుడిని మొదట చీరాలలోని స్థానిక ఆసుపత్రిలో చూపించగా వైద్యుల సలహా మేరకు గుంటూరు ప్రభుత్వ ఆసుపత్రికి తరలించారు. అయితే అక్కడి వైద్యులు పట్టించుకోడం లేదని గుంటూరులోనే మరో ప్రైవేట్ ఆసుపత్రికి కిరణ్​ను తీసుకెళ్లారు అతని కుటుంబ సభ్యులు. అక్కడ చికిత్స పొందుతూ కిరణ్ బుధవారం ఉదయం మృతి చెందాడు.

తన కుమారుడి మృతికి కారణమైన ఎస్సై విజయ్ కుమార్​పై కఠినమైన చర్యలు తీసుకోవాలని తండ్రి మోహనరావు డిమాండ్ చేశారు. మాస్క్ లేదన్న చిన్న కారణం చూపించి చంపేశారని ఆవేదన వ్యక్తం చేశారు.

ఇదీ చదవండి