వనాలను తలపిస్తున్న సుబాబుల్​.. సరైన ధరే లేదు..

Subabul Farmers: దేశం అన్ని రంగాల్లో అభివృద్ధి చెందుతోందని ప్రభుత్వాలు చెబుతున్నాయి.. కానీ ఆ దేశానికే అన్నం పెట్టే అన్నదాతలకు మాత్రం కష్టాలు తప్పడం లేదు. ఆధునిక సాంకేతిక వచ్చినా ఆ రైతన్నల కన్నీళ్లను మాత్రం ఆపడంలేదు. ఒక పంటలో నష్టం వస్తే మరో ప్రత్యమ్నాయ పంటను వేయాలని సర్కార్​ చేబుతోంది. ఆ పంటలో కూడా ఆ నిరాశే ఎదురైతే ఆ కర్షకుడి అవేదన చెప్పతరమా..? ప్రస్తుతం సుబాబుల్​ రైతుల పరిస్థితి అదే.. సరైన ధర రాక పంటను పొలంలోనే వదిలేసే దుస్థితి ఏర్పడింది. ప్రభుత్వం స్పందించి తమకు సాయం చేయాలని రైతులు కోరుతున్నారు.

Subabul Farmers: సుబాబుల్‌ రైతులకు కొన్నేళ్లుగా నష్టాలు తప్పడం లేదు. ధర లేదంటూ ఏళ్లుగా కోతలు చేపట్టకపోవడంతో సుబాబుల్‌ తోటలు వనాలను తలపిస్తున్నాయి. ఆరేడేళ్లుగా సుబాబుల్‌కు మార్కెట్‌ లేక.. పొలాల్లోనే వదిలేశామంటూ రైతులు చెబుతున్నారు. లక్షల రూపాయలు పెట్టుబడి పెట్టి.. అమ్ముకోలేని పరిస్థితిలో ఏటా నష్టపోతున్నామని ఆవేదన చెందుతున్నారు.

Subabul Farmers: ప్రకాశం జిల్లా అద్దంకి, జె.పంగులూరు, కొరిసపాడు, మార్టూరు తదితర మండలాల్లో దాదాపు 70వేల ఎకరాల్లో సుబాబుల్ సాగు చేస్తున్నారు. మూడేళ్లుగా సుబాబుల్‌కు సరైన ధర లేకపోవడం, కనీసం నష్టానికైనా అమ్ముకుందామన్నా కొనేవారు లేకపోవడం వల్ల.. సుబాబుల్‌ కోతలకు నోచుకోవడం లేదు. ఎటుచూసినా ఏపుగా పెరిగి సుబాబులు తోటలు అడవులను తలపిస్తున్నాయి. మొదట్లో మంచి ధర రావడంతో రైతులు సుబాబుల్‌ సాగు వైపు మొగ్గుచూపారు. ప్రస్తుతం కనీస ధర కూడా లభించకపోవడంతో.. ఇప్పటికే 3 కోతలు చేయాల్సిన తోటలను అలాగే వదిలేశామని రైతులు వాపోతున్నారు.

సుబాబుల్‌ ధర ఏడాదికేడాది పడిపోతుండటంతో.. రైతులు నష్టాల్లో కూరుకుపోతున్నారు. ఆరేళ్ల క్రితం టన్ను 4వేల రూపాయల వరకు పలికిన ధర.. ఇప్పుడు 12 వందల రూపాయలు కూడా పలకడంలేదని రైతులంటున్నారు. సుబాబుల్‌ తోటలు తొలగించి, వేరే పంటలు వేసుకుందామన్నా.. కోత ఖర్చులు కూడా వచ్చేలా లేవంటున్నారు. వ్యాపారులు కూడా ఎవరో కొద్ది మంది రైతుల పంటను మాత్రమే కొంటున్నారని, దీని వల్ల 90 శాతం పంట అమ్ముడు పోవడం లేదని వాపోతున్నారు. గత ప్రభుత్వంలో సుబాబుల్‌ కొనుగోళ్లకు మార్కెటింగ్‌ శాఖ చొరవ చూపిందని రైతులంటున్నారు. ప్రభుత్వ పర్యవేక్షణలో కొనుగోళ్లు జరిగి రైతులకు న్యాయం జరిగేదని.. ప్రస్తుత ప్రభుత్వంలో పర్యవేక్షణ లేకపోవడం వల్ల వ్యాపారులు ఇష్టారాజ్యంగా వ్యవహరిస్తున్నారని రైతులు ఆరోపిస్తున్నారు. ఇప్పటికైనా ప్రభుత్వం సుబాబుల్‌ మార్కెట్‌పై దృష్టి పెట్టాలని రైతులు కోరుతున్నారు.

ఇదీ చదవండి: Solar Plant: సోలార్​ ప్రాజెక్టు వద్దన్న రైతులు..తీరా ఒప్పించి అధికారులు ఏం చేశారంటే