హైటెక్ బెట్టింగ్ ముఠా గుట్టు రట్టు... 17 మంది అరెస్టు

ఒంగోలు కేంద్రంగా బెట్టింగ్​లకు పాల్పడుతున్న ఓ ముఠాను ప్రకాశం జిల్లా పోలీసులు అరెస్టు చేశారు. వారి నుంచి ఓ కమ్యూనికేటర్, భారీగా నగదు, సెల్​ఫోన్లు, ల్యాప్​టాప్​లను స్వాధీనం చేసుకున్నారు.

రెండు తెలుగు రాష్ట్రాల్లో క్రికెట్‌ బెట్టింగ్‌ల నిర్వహణ, వ్యాపార అభివృద్ధికి కొంతమంది యువకుల నియామకం వంటి అక్రమాలకు పాల్పడుతున్న ముఠాను ప్రకాశం జిల్లా పోలీసులు అరెస్టు చేశారు. పశ్చిమగోదావరి జిల్లా భీమవరానికి చెందిన కొమ్మిశెట్టి రమేశ్ కొంతమంది సభ్యులతో కొద్ది కాలంగా క్రికెట్‌, ప్రో కబడ్డీ వంటి క్రీడల్లో బెట్టింగ్‌ నిర్వహిస్తున్నారు. నిరుద్యోగ, మధ్య ,పేద యువకులను గుర్తించి వారిని నమ్మించి ఈ బెట్టింగ్‌లో పాల్గొనేలా చేస్తున్నాడు. పూసపాటి లక్ష్యయ్య అనే పాత నేరస్థుడిని కలిసేందుకు రమేశ్, అతని ముఠాలో 16 మంది ఇవాళ ఒంగోలు వచ్చారు. విషయాన్ని తెలుసుకున్న పోలీసులు వలపన్ని వీరని అదుపులో తీసుకున్నారు. వీరంతా ఒంగోలు పట్టణంలో ఓ అద్దె ఇంట్లో ఉంటూ రెండు రాష్ట్రాల యువకులతో బెట్టింగ్‌ నిర్వహిస్తున్నారు. అంతేకాకుండా తమ అక్రమ వ్యాపారాన్ని మరికొంత మందికి చేరువ చేసేందుకు కొత్త వారిని సభ్యులుగా నియమించే కార్యక్రమం కూడా చేపట్టినట్లు పోలీసులు గుర్తించి సోదాలు నిర్వహించారు. బెట్టింగ్‌లకు వినియోగించే ఒక కమ్యూనికేటర్‌, మొబైల్‌ ఫోన్లు, రెండు ల్యాప్​టాప్‌లు, 16.11లక్షల నగదు స్వాధీనం చేసుకున్నారు. మొత్తం 17 మందిని అరెస్టు చేశారు.