Farmers Problems: ఆరుతడి పంటలు సాగు.. నీరందక రైతుల దిగాలు

Farmers Problems: ఆరుతడి పంటలు వేసుకోండి.. ఆ మేరకే నీళ్లు ఇస్తామని అధికారులు చెప్పడంతో రైతులంతా ఆరుతడి పంటలపై దృష్టి సారించారు. తీరా పంటలు వేశాక అధికారులు నీటి సరఫరాలో హెచ్చుతగ్గులు పాటిస్తూ నిర్లక్ష్యం వహిస్తున్నారు. దీంతో శివారు ఆయకట్టు పొలాలకు నీరు అందక పొలాలు ఎండిపోతున్నాయి. ప్రజాప్రతినిధులు రంగంలోకి దిగి గట్టిగా నిలదీస్తే.. కొన్ని రోజులు సక్రమంగా నీటిని విడుదల చేస్తున్నారు. తర్వాత మామూలే. దీంతో రైతులు నీటి కోసం అష్టకష్టాలు పడుతున్నారు.

Farmers Problems: ప్రకాశం జిల్లా అద్దంకి రైతులు ఎక్కువ శాతం మిరప, మొక్కజొన్న, పొగాకు, కూరగాయలు, కరవేపాకు వంటి ఆరుతడి పంటలు వేసుకున్నారు. నవంబర్‌లో కురిసిన అధిక వర్షాలు కారణంగా పంటలు నీటిపాలయ్యాయి. నష్టాన్ని పూడ్చుకోవడం కోసం వర్షాలు తగ్గాక మళ్లీ నారువేసుకొని సాగు చేపట్టారు. అధికారులు ఆరుతడి పంటలు వేసుకోమని చెప్పడంతో.. వరి పండించకుండా ఈ పంటలపై దృష్టిపెట్టారు. సాగు ఆలస్యం కావడం వల్ల ఏప్రిల్‌ వరకూ పంటలకు నీటి అవసరం ఉంటుంది. అయితే సాగర్‌ నుంచి నీరు విడుదల చేయకపోవడంతో పంటలకు నీరు అందక ఎండిపోతున్నాయి.

మరో వైపు ఎగువున పూర్తిస్థాయిలో విడిచిపెట్టినా.. కాలువల నిర్వహణ సక్రమంగా లేక దిగువ పొలాలకు నీరు అందని దుస్థితి. కాలువల్లో పూడికలు తీయకపోవడం వల్ల పంటలకు నీరు అందక పంటలు నిర్జీవంగా మారాయి. అధికారులు చెప్పిన మాట ప్రకారం నీటిని విడుదల చేయాలని రైతులు కోరుతున్నారు.

ప్రజాప్రతినిధులు చొరవ తీసుకొని గట్టిగా అడిగితే.. అధికారులు నీటి సరఫరాను కొంతమేర పెంచుతున్నారు. తర్వాత పట్టించుకోవడం లేదు. సాగర్ కాలువ నుంచి కనీసం 900 క్యూసెక్కుల నీటిని విడుదల చేస్తే.. అద్దంకి, మార్టూరు ప్రాంతాల శివారు భూములకు నీరు అందుతుందని అద్దంకి ఎమ్మెల్యే గొట్టిపాటి రవికుమార్‌ అన్నారు. ప్రస్తుతం పంటలు పొట్టదశలో ఉన్నాయని.. సాగర్‌ నుంచి మరో నెలరోజులు పాటు నిరంతరంగా నీరు సరఫరా చేయాలని కోరారు. చివరి దశలో ఉన్న పంటలకు పూర్తిస్థాయిలో సాగర్‌ కాలువ నుంచి నీరు అందించి నష్టాల సాగు నుంచి గట్టెక్కించాలని రైతులు విజ్ఞప్తి చేస్తున్నారు.

ఇదీ చదవండి: