రాష్ట్రంలో రాజ్యాంగ సంక్షోభం ఏర్పడవచ్చు: నారాయణ

రాష్ట్రంలో రాజ్యాంగ సంక్షోభం ఏర్పడే ప్రమాదం ఉందని సీపీఐ నేత నారాయణ అన్నారు. నేతలు తమపై ఉన్న కేసులకు భయపడి ప్రజలకు అన్యాయం చేస్తున్నారని విమర్శించారు. స్థానిక సంస్థలకు ఎన్నికల నిర్వహణ అత్యవసరమన్నారు.

రాష్ట్రంలో రాజ్యాంగ సంక్షోభం ఏర్పడే ప్రమాదం ఉందని సీపీఐ జాతీయ కార్యదర్శి నారాయణ అభిప్రాయపడ్డారు. ప్రకాశం జిల్లా అద్దంకిలో ఓ వివాహానికి హాజరైన ఆయన.. మీడియాతో మాట్లాడారు. స్థానిక ఎన్నికలు నిర్వహించాలని ఎన్నికల కమిషన్ ప్రకటించిందని.. ఇదే సమయంలో ఎన్నికలను నిలిపివేయాలని కోరుతూ ప్రభుత్వం సుప్రీంకోర్టుకు వెళ్లే యోచనలో ఉందన్నారు.

దివంగత ప్రధాని రాజీవ్ గాంధీ చేసిన రాజ్యాంగ సవరణ ద్వారా స్థానిక సంస్థలకు ఎన్నికలు జరిగితేనే కేంద్రం నుంచి రావాల్సిన నిధులు విడుదలవుతాయన్నారు. దీన్ని దృష్టిలో పెట్టుకుని ఎన్నికల కమిషన్ స్థానిక సంస్థల ఎన్నికల నిర్వహణకు కసరత్తు ప్రారంభించిందని తెలిపారు. స్వతంత్ర ప్రతిపత్తి కలిగిన ఎన్నికల సంఘం విషయంలో ఏ న్యాయస్థానమూ జోక్యం చేసుకునే అవకాశం ఉండదన్నారు.

ఈ పరిణామాలతో అటు ప్రభుత్వానికి, ఎన్నికల కమిషన్​కు మధ్య యుద్ద వాతాపరణం నెలకొందన్నారు. రాజ్యాంగానికి విరుద్ధంగా ప్రవర్తిస్తే ప్రభుత్వానికి తలనొప్పి వచ్చే అవకాశం ఉందన్నారు. ఆర్ఎస్ఎస్ చర్యలను సమర్థంగా ఎదుర్కొనకపోతే రాష్టంలో అధికార, ప్రతిపక్ష పార్టీలకు ఇబ్బంది తప్పదన్నారు. కేవలం కేసులకు భయపడి ప్రజలకు అన్యాయం చేస్తున్నారని విమర్శించారు. దిల్లీలో జరుగుతున్న రైతు ఉద్యమంలో ఇప్పటి వరకు 50 మంది రైతులు కన్నుమూశారని.. అయినా పోరాటం చేస్తున్నారని కొనియాడారు. సాగు చట్టాల విషయంలో వెనుకకు తగ్గేది లేదన్నారు.

ఇదీ చదవండి: