పంటను పీడిస్తున్న తెగుళ్లు... పట్టించుకోని అధికారులు

ఈ ఏడాదిలో వర్షాలు, వాతావరణం అనుకూలించడం వల్ల రైతులు ఎన్నో ఆశలతో పంటను వేశారు. కానీ కనిగిరి నియోజకవర్గంలోని ఆరు మండలాల్లో రైతులు మినుము పంట సాగుచేశారు. అయితే ఈ మధ్య అధిక వర్షాలు కురవడం వల్ల ఆ పంటలకు కొత్త తెగుళ్లు సోకడం వల్ల అన్నదాతలు అందోళన చెందుతున్నారు. అధికారులు తక్షణమే స్పందించి తెగుళ్లపై తగిన సలహాలు, సూచనలు ఇవ్వాలని కోరుతున్నారు.

ప్రకాశం జిల్లా అంటేనే విపరీతమైన కరవు కాటకాలకు నిలయం. చివరికి మెట్ట పంట సాగు కూడా అంతంత మాత్రంగానే వుంటుంది. రైతులు వర్షాధార పంటలు సాగుచేస్తుంటారు. ఈ ఏడాది మొదట్లో విస్తారమైన వర్షాల పడటం వల్ల రైతులు ఆశలతో పంటల సాగు ప్రారంభించారు. కనిగిరి నియోజకవర్గంలోని ఆరు మండలాల్లో అధిక శాతం రైతులు మినుము సాగుచేశారు.

అయితే పంట చేతికొచ్చే సమయంలో రైతులకు కష్టాలు మొదలయ్యాయి. తెగుళ్లు, అధిక వర్షాలు, మారిన వాతావరణం రైతుల పాలిట శాపాలుగా మారి రైతులను కష్టాల కడలిలోకి నేట్టేశాయి. ముందుగా వేసిన పంటకు పల్లాకు తెగులు సోకగా, చివరగా వేసిన లేత పంటకు లద్దె పురుగు, పచ్చ పురుగు, చుట్ట పురుగు సోకింది. దీంతో పంట దిగుబడి మందగించింది.

కొద్దో గొప్పో పంట చేతి కొచ్చినా అది కూలీలకు కూడా సరిపోవడం లేదని రైతులు అందోళన చెందుతున్నారు. అధికారులు తక్షణమే స్పందించాలని.. పంటలకు పట్టిన తెగుళ్లను పరిశీలించి రైతులకు తగిన సలహాలు, సూచనలు ఇవ్వాలని కోరుతున్నారు.

ఇదీ చదవండి: