గుర్తు తెలియని వ్యక్తులు ప్రకాశం జిల్లాలో ఎస్పీతో పాటు పలువురు సీఐ, ఎస్ఐల పేర్లతో నకిలీ ఫేస్ బుక్ అకౌంట్లను తెరిచి అక్రమాలకు పాల్పడ్డారు. ఈ అకౌంట్ల నుంచి డబ్బులు కావాలంటూ పలువురికి అభ్యర్ధనలు పంపించారు. ఈ వ్యవహారాన్ని పోలీసులు సీరియస్గా తీసుకొని కేసును ఛేదించే పనిలో పడ్డారు. ఆ అకౌంట్లు రాజస్థాన్లోని భరత్ పూర్ జిల్లా జిహెగా పోలీస్ స్టేషన్ పరిధిలోని నగ్లాకుందన్ గ్రామంలోని వ్యక్తులు ప్రారంభించి మోసాలకు పాల్పడుతున్నట్లు గుర్తించారు.
నిందితులను పట్టుకునేందుకు ప్రకాశం జిల్లా నుంచి ఇద్దరు ఎస్ఐలు, ఇద్దరు కానిస్టేబుళ్లు బృందంగా వారం రోజుల క్రితం రాజస్థాన్ వెళ్లారు. జీహెగా పోలీసులు సహకారంతో ఆదివారం ఉదయం నగ్లాకుందన్కు చేరుకున్నారు. నిందితుల కోసం వెతుకులాట చేస్తున్న సమయంలో గ్రామస్థులు పోలీసులపై దాడికి దిగినట్లు తెలిసింది. రాళ్లు రువ్వి, పోలీసుల వద్ద ఉన్న సెల్ఫోన్లను లాక్కున్నట్లు సమాచారం.. ఈ దాడిలో ఒకరికి స్వల్పంగా గాయాలయినట్లు తెలుస్తోంది. ఎట్టకేలకు ఏడుగురు అనుమానితులను అదుపులో తీసుకున్నట్లు సమాచారం. ఈ దాడి సమాచారాన్ని జిల్లా పోలీసులు గోప్యంగా ఉంచుతున్నారు.