ప్రకాశం జిల్లాలో రైతులు ఎక్కువగా పొగాకు పంటను పండిస్తున్నారు. జిల్లా వ్యాప్తంగా 20 వేల పొగాకు బ్యారన్‌లు ఉన్నాయి. ఒక్కో బ్యారన్‌కి ఏడు ఎకరాల పంట సాగు చేయడానికి మాత్రమే అనుమతి ఉంది. దీనికి మించి అదనంగా పండిస్తే 10 శాతం రుసుం కట్టాల్సి వచ్చేది. ప్రస్తుతం కేంద్ర ప్రభుత్వం ఈ రుసుమును ఐదు శాతం తగ్గించింది. దీంతో రైతులు పొగాకు సాగు చేయడానికి మొగ్గు చూపారు. జిల్లావ్యాప్తంగా 42 వేల హెక్టార్లలో సాగు చేయడానికి 26 వేల మంది రైతులు నమోదు చేసుకున్నారు. ఇప్పటి వరకు దాదాపు 40 వేల హెక్టార్లలో పొగాకు సాగు అయ్యింది.
గ్రేడ్ను బట్టి ధర...
జిల్లాలో మొత్తం తొమ్మిది పొగాకు బోర్డుల పరిధిలో గత సంవత్సరం 63.98 మిలియన్‌ కిలోల పొగాకును అమ్మారు. ఎఫ్1 గ్రేడ్ పొగాకు రకానికి గరిష్ఠంగా 184 రూపాయలు, సరాసరి ధర 139, ఎఫ్10 రకానికి 10 రూపాయలు పలికింది. దీంతో కొంత మంది రైతులు అదనంగా పొగాకు సాగు చేయడానికి ఆసక్తి చూపించారు. అయితే జిల్లాలోని టంగుటూరు, ఎన్జీపాడు తదితర ప్రాంతాల్లో పొగాకుకు పచ్చనగ పురుగు, లద్దె పురుగు, పొగ మల్లెతో పాటు పేనుబంక తెగులు సోకింది. వీటిని సమయానికి గుర్తించి మందులు పిచికారీ చేశారు.