ఎదురుగా వస్తున్న రెండు ద్విచక్రవాహనాలను ఓ కారు ఢీకొన్న ఘటన ప్రకాశం జిల్లా చీరాల-కారంచేడు రహదారిపై చోటు చేసుకుంది. ఈ ఘటనలో ఓ మహిళ మృతి చెందగా.. మరో ముగ్గురికి తీవ్రగాయాలయ్యాయి. చీరాల వైకుంఠపురానికి చెందిన శ్రీనివాసరావు, ఉషారాణి దంపతులు గుంటూరులో శుభకార్యానికి వెళుతున్నారు. మరో ద్విచక్రవాహనంపై మరో ఇద్దరు పర్చూరు వెళుతున్నారు. ఈ క్రమంలో కారంచేడు సమీపంలో పర్చూరు వైపు నుంచి వేగంగా వచ్చిన కారు.. రెండు ద్విచక్ర వాహనాలను ఢీ కొట్టింది. ప్రమాదంలో ఉషారాణి(43) అక్కడికక్కడే మృతి చెందగా... ద్విచక్ర వాహనాలపై ప్రయాణిస్తున్న శ్రీనివాసరావు, సిరారుద్దిన్, ముస్తఫా అనే మరో ముగ్గురికి తీవ్రగాయాలయ్యాయి.
క్షతగ్రాతులను గుంటూరు ఆసుపత్రికి తరలించారు. కేసు నమోదు చేసుకున్న పోలీసులు ప్రమాదానికి కారు డ్రైవర్ అతివేగమే కారణమని నిర్ధారించారు.