Mekapati Goutham Reddy Passed Away:మంత్రి గౌతమ్రెడ్డి ఆకస్మిక మరణం చాలా బాధాకరమని తెదేపా అధినేత చంద్రబాబు అన్నారు. ఈ ఉదయం గుండెపోటుతో చనిపోయిన గౌతమ్రెడ్డి నివాసానికి వెళ్లిన ఆయన.. మంత్రి పార్థివదేహానికి నివాళులర్పించారు. జూబ్లీహిల్స్‌లోని ఇంటికి వెళ్లి గౌతమ్రెడ్డి కుటుంబసభ్యులను పరామర్శించిన అనంతరం చంద్రబాబు మీడియాతో మాట్లాడారు. తెల్లవారుజాము వరకు ఆరోగ్యంగా ఉండి జిమ్‌కు వెళ్తున్న సమయంలో ఛాతీలో నొప్పి రావడంతో గౌతమ్‌రెడ్డిని అపోలోకు తరలించారన్నారు. ఆస్పత్రికి వెళ్లే సరికే శ్వాస ఆడని పరిస్థితి నుంచి హఠాన్మరణం చెందడం విచారకరమని చెప్పారు.
గౌతమ్రెడ్డి ఇటీవల దుబాయ్‌లో పర్యటనకు సంబంధించి టీవీలో వార్తలు చూసినట్లు చంద్రబాబు తెలిపారు. గౌతమ్రెడ్డి వివాదాల జోలికి పోకుండా హుందాగా, సమర్థంగా పని చేశారని కొనియాడారు.గౌతమ్రెడ్డి ఆత్మకు శాంతి కలగాలని.. ఆయన కుటుంబ సభ్యులు ధైర్యంగా ఉండాలని ఆకాంక్షించారు.
వినయం.. విధేయతల చిరునామా - లోకేశ్
గౌతమ్రెడ్డి హఠాన్మరణం తీవ్ర దిగ్భ్రాంతి కలిగించిందని తెదేపా జాతీయ ప్రధాన కార్యదర్శి నారా లోకేశ్ అన్నారు. ఫిట్‌నెస్‌కు ప్రాధాన్యత ఇచ్చే వ్యక్తికి గుండెపోటు రావడంపై విచారం వ్యక్తం చేశారు. వినయం, విధేయ‌త‌లు ఆయన చిరునామా అని.. ఐదుప‌దుల వ‌య‌స్సులోనే హుందా గ‌ల వ్యక్తి అంటూ కొనియాడారా.
దురదృష్టకరం - ఎమ్మెల్యే బాలకృష్ణ
రాజకీయాల్లో గౌతమ్రెడ్డి అందరితో కలుపుగోలుగా ఉంటూ మంచి పేరుతెచ్చుకున్నారని ప్రముఖ సినీనటుడు, హిందూపురం ఎమ్మెల్యే నందమూరి బాలకృష్ణ అన్నారు. ఇలాంటి నవతరం నాయకుడిని చిన్నతనంలోనే కోల్పోవడం దురదృష్టకరమని చెప్పారు. ఆయన ఆత్మకు శాంతి చేకూరాలని ఆకాంక్షించారు.
మచ్చలేని మంత్రి - సోమిరెడ్డి
మంత్రి గౌతమ్ రెడ్డి ఇకలేరన్న వార్త తనను చాలా బాధించిందని తెదేపా నేత, మాజీ మంత్రి సోమిరెడ్డి చంద్రమోహన్ రెడ్డి విచారం వ్యక్తం చేశారు. చిన్నవయస్సులోనే చనిపోవడం బాధాకమన్నారు. గౌతమ్ రెడ్డి తనకు బంధువని.. బంధువుల నిశ్చితార్థ కార్యక్రమంలో రాత్రే కలిశానని చెప్పారు. గౌతమ్ రెడ్డి వివాదరహితుడని.. మచ్చలేని మంత్రిగా పనిచేశారన్నారు.
షాకింగ్గా ఉంది - ఎంపీ గల్లా
మంత్రి గౌతమ్రెడ్డి ఇకలేరనే విషయం చాలా షాకింగ్గా ఉందని తెదేపా ఎంపీ గల్లా జయదేవ్‌ అన్నారు. ఆయనతో తనకు 30 ఏళ్ల అనుబంధముందని చెప్పారు. తాము రాజకీయాల్లోకి తమ కుటుంబాలు మంచి సంబంధాలు కలిగి ఉన్నాయని చెప్పారు. యువ నేతలకు గౌతమ్ స్ఫూర్తిగా ఉండేవారని జయదేవ్‌ అన్నారు.
గౌతమ్ రెడ్డి మృతి బాధాకరం - సీపీఎం, సీపీఐ
మంత్రి గౌతమ్రెడ్డి మృతి పట్ల సీపీఐ రాష్ట్ర కార్యదర్శి రామకృష్ణ సంతాపం వ్యక్తం చేశారు. చిన్న వయసులోనే గౌతమ్ రెడ్డి హఠాన్మరణం బాధాకరమని చెప్పారు. మంత్రి గౌతమ్రెడ్డి మృతి పట్ల సీపీఎం రాష్ట్ర కార్యదర్శి శ్రీనివాసరావు కూడా సంతాపం తెలిపారు. కుటుంబసభ్యులకు తన ప్రగాఢ సానుభూతిని వ్యక్తం చేశారు.