SOMIREDDY ON HIGH COURT JUDEGEMENT OVER THEFT IN NELLORE COURT : నెల్లూరు కోర్టులో దస్త్రాలు అపహరణ కేసును హైకోర్టు.. సీబీఐకి అప్పగించడాన్ని టీడీపీ సీనియర్ నేత సోమిరెడ్డి చంద్రమోహన్ రెడ్డి స్వాగతించారు. రాష్ట్ర పోలీసు వ్యవస్థలపై తమకు నమ్మకం లేదని కోర్టు కూడా చెప్పినట్లైందని ఆయన పేర్కొన్నారు. సీబీఐ విచారణ త్వరితగతిన పూర్తి చేయాలని కోరారు. మాయమైన దస్త్రం ఫిర్యాదుదారుడిని తానే కాబట్టి.. తన అభిప్రాయమూ సీబీఐ తీసుకోవాలన్నారు.
కాకాని వెంటనే మంత్రి పదవికి రాజీనామా చేయాలని సోమిరెడ్డి డిమాండ్ చేశారు. ఘోరమైన నేరాలు చేసే కాకానిని వెంటనే మంత్రి పదవి నుంచి తొలగించాలన్నారు. వివేకా హత్య కేసులా నాన్చకుండా తొందరగా కేసు దర్యాప్తును పూర్తి చేయాలన్నారు. జిల్లా ఎస్పీ సహా స్థానిక అధికారుల్ని తప్పించి, న్యాయస్థానం పర్యవేక్షణలో సీబీఐ విచారణ జరగాలని కోరారు.
"నెల్లూరు కోర్టులో సాక్ష్యాల చోరీ కేసును సీబీఐకి అప్పగించడాన్ని స్వాగతిస్తున్నా. తప్పుడు పత్రాలతో అసత్య ఆరోపణలపై కాకాణిపై నేనే కేసు పెట్టా. కాకాణివి తప్పుడు పత్రాలని విచారణలో తేలి ముగ్గురు అరెస్టయ్యారు. కేసు కీలక దశలో ఉండగా కాకాణికి మంత్రి పదవి ఇచ్చారు. మంత్రి పదవి వచ్చిన మరుసటిరోజే కేసు సాక్ష్యాలు పోయాయి. కోర్టులోని 4 వేల దస్త్రాల్లో ఒక్క కాకాణి దస్త్రమే పోయిందా?. కాకానికి మానవత్వం ఉంటే తన మంత్రి పదవికి రాజీనామా చేయాలి"-సోమిరెడ్డి, టీడీపీ నేత
సీబీఐకి అప్పగింత: ఏపీ హైకోర్టు కీలక నిర్ణయం తీసుకుంది. నెల్లూరు కోర్టులో జరిగిన చోరీ కేసును సీబీఐకి అప్పగించింది. ఈ మేరకు ప్రధాన న్యాయమూర్తి జస్టిస్‌ పి.కె.మిశ్రా ఆదేశాలు జారీచేశారు. ఈ కేసులో రాష్ట్ర పోలీసుల దర్యాప్తు సరైన దిశలో జరగడం లేదని, స్వతంత్ర దర్యాప్తు సంస్థతో విచారణ చేస్తేనే వాస్తవాలు వెలుగులోకి వస్తాయని నెల్లూరు జిల్లా ప్రధాన న్యాయమూర్తి (పీడీజే) ఇచ్చిన నివేదిక ఆధారంగా హైకోర్టు సుమోటో పిల్‌గా పరిగణించి విచారణ చేపట్టింది. కేసును సీబీఐకి అప్పగించినా తమకు అభ్యంతరం లేదని అడ్వకేట్‌ జనరల్‌ (ఏజీ) గతంలో ఉన్నత న్యాయస్థానానికి తెలిపారు.