నెల్లూరు జిల్లాలో కలువాయి మండంలోని వేరుబొట్లపల్లి, వెంకటరెడ్డిపల్లి గ్రామాల్లో రోడ్లు అధ్వానంగా మారాయి. ఇటీవలి వర్షాలకు రోడ్ల పరిస్థితి మరింత దారుణంగా తయారైంది. వర్షాలకు రోడ్లన్నీ బురదమయంగా మారాయి. దీంతో విసుగు చెందిన గ్రామస్థులు వినూత్నంగా నిరసన తెలిపారు. బురద రోడ్లపై వరినాట్లు వేశారు.
కానుపూరుపల్లి పంచాయతీ వేరుబొట్లపల్లి ఎస్సీ కాలనీలో రోడ్లు అధ్వానంగా ఉన్నాయని స్థానికులు తెలిపారు. రోడ్ల మీద నడవడం కష్టంగా మారిందంటున్నారు. వెంకటరెడ్డిపల్లి గ్రామంలో సచివాలయం దగ్గర ప్రధాన రోడ్డు గుంతలమయంగా ఉందని గ్రామస్థులు అంటున్నారు. 300 ఇళ్లున్న గ్రామంలో చాలా ఏళ్ల నుంచి రోడ్లు వేయలేదన్నారు. నిరసనగా గ్రామస్థులంతా బురదరోడ్లపై నాట్లు వేశారు. సచివాలయాన్ని మూసివేసి నిరసన వ్యక్తం చేశారు. ప్రభుత్వం స్పందించి రోడ్లు వేయించాలని కోరారు.
ఇదీ చదవండి :బాలికను అపహరించారు.. రూ.30 వేలకు అమ్మేశారు
