నీరు విడుదల చేశారు.. కాలువల్లో పూడిక తీయడం మరిచారు..!

పెన్నా డెల్టా ఆయకట్టు పరిధిలో రైతులు రెండో పంట వేసేందుకు అధికారులు నీరు విడుదల చేశారు. అయితే కాలువల్లో పూడిక తీయకపోవడం వల్ల ఇబ్బందులు పడుతున్నామని రైతులు వాపోతున్నారు. ప్రస్తుతం కాలువల్లో పూడికతీతపై ప్రభుత్వం నుంచి ఎలాంటి ఆదేశాలు రాలేదని జలవనరుల శాఖ అధికారులు చెబుతున్నారు. ఈ పరిస్థితిపై ప్రత్యేక కథనం..!

నెల్లూరు జిల్లాలోని పెన్నా డెల్టా ఆయకట్టు పరిధిలో లక్షా ఎనభై వేల ఎకరాలకు ఈనెల 20వ తేదీన సాగునీటిని జలవనరుల శాఖ అధికారులు విడుదల చేశారు. ఈ క్రమంలో రైతులు పొలాల్లో నాట్లకు సిద్ధమయ్యారు. అయితే కాలువల్లో పూడికలు తీయకపోవడం వల్ల సక్రమంగా నీరు రావడం లేదని రైతులు ఆందోళన వ్యక్తం చేస్తున్నారు.

కాలువల్లో పేరుకుపోయిన చెత్త...

పెన్నా డెల్టా ఆయకట్టు పరిధిలోని సర్వేపల్లి కెనాల్, జాఫర్ సాహెబ్ కెనాల్, కృష్ణపట్నం కాలువ ప్రధానమైనవి. ఈ కాలువల్లో గుర్రపు డెక్క, పూడికతో చెత్త పేరుకుపోయి కనిపిస్తున్నాయి. కాలువల పరిధిలోని చిన్న కెనాల్స్​ పరిస్థితి మరింత అధ్వాన్నంగా ఉందని అన్నదాతలు చెబుతున్నారు. పూర్తిస్థాయిలో కాలువల్లో పూడిక తీస్తే తప్ప నీళ్ల సమృద్ధిగా రావని అంటున్నారు. ఇప్పటికైనా అధికారులు దృష్టి సారించి పూడికలు తీయాలని.. లేకుంటే రెండో పంట పండే పరిస్థితి లేదని రైతులు వాపోతున్నారు.

ప్రభుత్వం నుంచి ఆదేశాలు రాలేదు...

గత సీజన్​లో కాలువల్లో పూడికలు తీశామని.. ప్రస్తుతం పూడికలు తీయమని ప్రభుత్వం నుంచి ఎలాంటి ఆదేశాలు రాలేదని జలవనరుల శాఖ సెంట్రల్​ డివిజన్​ ఈఈ కృష్ణ మోహన్​ తెలిపారు. ఈ విషయాన్ని ప్రభుత్వం దృష్టికి తీసుకెళ్తామని అన్నారు. ఈ లోపు రైతులే స్వచ్ఛందంగా పూడికలు తీసుకోవాలని సూచిస్తున్నారు.

ఇదీ చూడండి..

అకాల వర్షం.. పత్తి రైతుకు తీవ్ర నష్టం