నీళ్లు లేక పొలాలు బీళ్లు.. బోసిపోతున్న పల్లెలు

నెల్లూరు జిల్లాలో కరవు తాండవం చేస్తోంది. వర్షాభావంతో పల్లెలు బోసిపోతున్నాయి. వ్యవసాయం లేక రైతులు ఉపాధి కోసం వలసబాట పడుతున్నారు. గడ్డి లేక పశువులను తెగనమ్ముకుంటున్నారు. జిల్లాలోని కొన్ని ప్రాంతాల్లో భూగర్భ జలాలు అట్టడుగుకి పడిపోయి..తాగేందుకు నీరు దొరకని పరిస్థితినెలకొంది.

నెల్లూరు జిల్లాలో రైతుల బతుకు భారంగా మారింది. మూడేళ్లుగా సరైన వర్షాల్లేక పొలాలు బీళ్లుగా మారాయి. అప్పులు చేసి బోర్లు వేసినా చుక్కనీరు పడని దుస్థితి నెలకొంది. ఉదయగిరి, కలిగిరి, వింజమూరు ప్రాంతాల్లో.... అన్నదాతల పరిస్థితి మరీ దయనీయం. పశువులకు నీరు, గ్రాసం దొరక్క తెగనమ్ముకుంటున్నారు. దూర ప్రాంతాల నుంచి వరిగడ్డి తెద్దామన్నా... దొరకడం లేదని ఆవేదన వ్యక్తం చేస్తున్నారు.

కరవుతో జిల్లాలో రెండొంతులకుపైగా సాగు తగ్గింది. దీనివల్ల ఎండుగడ్డి కొరత ఏర్పడింది. కొంతమంది మూగజీవాలను దూరప్రాంతాలకు తోలుకుపోతుండగా... మరికొందరు అమ్మేస్తున్నారు. కావలి, ఆత్మకూరు, ఉదయగిరి, గూడూరు ప్రాంతాల్లో భూగర్భ జలాలు తగ్గి... తాగునీటికి సైతం ఇబ్బందులు తలెత్తుతున్నాయి.

వర్షాభావంతో వ్యవసాయం లేక ఆత్మకూరు, ఉదయగిరి, గూడూరు ప్రాంతాల్లోని కొందరు రైతులు ఊళ్లు వదిలి వలసపోతున్నారు. కూలీలు సైతం పనులు దొరక్క తిండికి ఇబ్బందిపడుతున్నారు.

ఉదయగిరి, ఆత్మకూరు, కావలి నియోజవర్గాల్లోని గ్రామాలకు.. సోమశిల నీరు వచ్చేలా ప్రభుత్వం చొరవ తీసుకోవాలని రైతులు కోరుతున్నారు. కాలువలను త్వరగా పూర్తి చేస్తే భూగర్భ జలాలు పెరిగి నీటి సమస్య కొంత తీరుతుందని అంటున్నారు.