SP Rohini on Secretariat Employee Death: తెలంగాణలోని మెదక్ జిల్లా టేక్మాల్ మండలం వెంకటాపురంలో ఇటీవల కారు తగలబడి, వ్యక్తి సజీవ దహనమైన కేసులో విస్తుగొలిపే వాస్తవాలు వెలుగులోకి వచ్చాయి. ఈ ఘటనలో చనిపోయాడనుకున్న ధర్మ అధర్మనాటకమాడినట్లు పోలీసులు గుర్తించారు. స్థానికంగా కలకలం రేపిన ఈ ఘటన మిస్టరీని పోలీసులు ఛేదించారు. ఇన్సూరెన్స్ డబ్బుల కోసం తన లాగా ఉన్న వ్యక్తిని చంపేందుకు ప్లాన్ వేసి.. అది బెడిసి కొట్టడంతో అనూహ్యంగా మరొకరిని హత్య చేసినట్లు విచారణలో తేలిందని ఎస్పీ రోహిణి ప్రియదర్శిని వెల్లడించారు.
పోలీసులు తెలిపిన వివరాల ప్రకారం.. 'మెదక్ జిల్లా టేక్మాల్ మండలం బీమ్లా తాండాకు చెందిన ధర్మ నాయక్ సెక్రటేరియట్లో అసిస్టెంట్ సెక్షన్ ఆఫీసర్గా పనిచేస్తున్నాడు. తొందరగా ఎక్కువ డబ్బులు సంపాదించాలని భావించి స్టాక్ మార్కెట్లో పెట్టుబడులు పెట్టాడు. కొవిడ్, ఉక్రెయిన్ యుద్ధం కారణంగా నష్ట పోయాడు. ఆ తరువాత చీటీలు వేసి ఆ డబ్బులను కూడా ట్రేడింగ్లో పెట్టాడు. రూ.85 లక్షల నష్టం వచ్చిందని వాటిని తీర్చేందుకు ఈ ప్లాన్ వేశాడు. ఈ క్రమంలో పథకం ప్రకారం రూ.7.4 కోట్ల విలువైన పాలసీలు తీసుకున్నాడు. ఆ తరువాత ఇన్సూరెన్స్ డబ్బుల కోసం తనలాగే ఉన్న వ్యక్తిని హత్య చేయాలని ధర్మా కుటుంబ సభ్యులతో కలిసి పక్కా వ్యూహంతో హత్యకు ప్రణాళిక రచించాడు.
తన మేనల్లుడు శ్రీనివాస్తో కలిసి హైదరాబాద్ నాంపల్లి నుంచి అంజయ్య అనే వ్యక్తిని నిజామాబాద్ సమీపంలో ఉన్న తన మామిడి తోటలో పని కల్పిస్తామని నమ్మించి తీసుకువచ్చాడు. ఆయనను ఈ నెల 7వ తేదీన నిజామాబాద్ తీసుకెళ్లారు. అయితే వారి తీరు అనుమానాస్పదంగా కనిపించడంతో అంజయ్య వారి నుంచి తప్పించుకున్నాడు. ఈ నేపథ్యంలో ధర్మా, శ్రీనివాస్ నిజామాబాద్ రైల్వే స్టేషన్ సమీపంలో బాబు అనే గుర్తు తెలియని వ్యక్తిని పని చూపిస్తామని తమ వెంట తీసుకువెళ్లి బాసరలో గుండు కొట్టించారు. అక్కడి నుంచి కారులో బీమ్లా తండాకు బయలు దేరారు. దారిలో అతనికి కల్లు తాగించారు. వెంకటాపూర్ సమీపంలోకి వచ్చాక గొడ్డలి, కర్రతో కొట్టి బాబును హత్య చేసి డెడ్ బాడీని కారులో వేసి పెట్రోల్ పోసి తగుల బెట్టారు. ఆ తరువాత ఇద్దరూ అక్కడి నుంచి నిజామాబాద్కు పారిపోయారు' అని ఎస్పీ రోహిణి ప్రియదర్శిని తెలిపారు.